जिल्हा परिषदेसाठी ५७ निवडणूक विभाग

पालघर, ता. १४ (बातमीदार) : पालघर जिल्हा परिषद व त्याअंतर्गत येणाऱ्या आठ पंचायत समित्यांच्या निवडणुकीकरिता प्रभाग रचना कार्यक्रम देण्यात आला आहे. राज्य सरकारच्या आदेशानुसार जिल्हा परिषदेसाठी एकूण ५७ निवडणूक विभाग, तर आठ पंचायत समित्यांसाठी एकूण ११४ निर्वाचक गण निश्चित करण्यात आले आहेत. त्यानुसार सदस्यसंख्या नेमून दिली आहे. ही आकडेवारी आज (ता. १४) जिल्हाधिकारी कार्यालय, जिल्हा परिषद कार्यालयाचा फलक, संकेतस्थळ, तहसील कार्यालयांसह पंचायत समिती कार्यालयाच्या नोटीस फलकांवर प्रसिद्ध करण्यात आली आहे. या प्रारूप प्रभाग रचना अधिसूचनेवर २१ जुलैपर्यंत नागरिकांकडून प्राप्त होणाऱ्या हरकती व सूचना संबंधित तहसील कार्यालये व जिल्हाधिकारी कार्यालयात स्वीकारण्यात येणार आहेत.

नागरिकांकडून प्राप्त होणाऱ्या हरकती व सूचनावर ११ ऑगस्टपर्यंत कोकण विभागाचे विभागीय आयुक्त यांच्यामार्फत सुनावणी घेऊन निर्णय देण्यात येणार आहे. त्यानंतर जिल्हाधिकारी यांनी पालघर जिल्हा परिषदेचे निवडणूक विभाग व त्याअंतर्गत येणाऱ्या आठही पंचायत समित्यांच्या निर्वाचक गणाची रचना अंतिम केल्यानंतर निर्वाचक गण अंतिम अधिसूचना १८ ऑगस्टपर्यंत प्रसिद्ध करण्यात येईल. त्याला जिल्हाधिकारी कार्यालय, तहसीलदार, पंचायत समिती कार्यालयातील सूचना फलक, संकेतस्थळावर प्रसिद्धी देण्यात येईल.

निर्वाचक गण व निवडणूक विभागाचे गट रचनेला २०११ मधील जनगणना विचाराात घेण्यात आली आहे. २०१९ मध्ये गट व गणांची आखणी करताना हस्त नकाशांचा वापर करण्यात आला होता. त्यामुळे काही ठिकाणी गावांची सलगता राखणे कठीण झाले होते. यंदा जिल्हा परिषद, पंचायत समितीच्या गट व गणांच्या रचना करताना नागपूर येथील महाराष्ट्र रिमोट सेन्सिंग ॲप्लिकेशन या शासकीय संस्थेचे नकाशे अभ्यासून गावांची भौगोलिक व सलगता राखण्यासाठी प्रयत्न करण्यात आला आहे.

१०-१२ निर्वाचक गणामध्ये किरकोळ बदल करण्यात आले आहेत, मात्र जिल्हा परिषद विभागांमध्ये गट कोणत्याही विशेष बदल झाला नसल्याचे सांगण्यात आले. जिल्हा परिषदेचे विभाग अथवा पंचायत समितीचे निर्वाचक गण यांची नावे करताना पूर्वीच्या प्रभावाचे सर्वात मोठ्या ग्रामपंचायतीचे नाव दिले जायचे, मात्र यावर्षी सरकारने दिलेल्या नवीन निकषानुसार या निर्वाचक गट व निवडणूक विभागाचे नाव त्या प्रभागातील सर्वात अधिक लोकसंख्येच्या गावाच्या आधारे नमूद करण्यात आल्याची माहिती जिल्हा प्रशासनाने दिली आहे.