तोतया पोलिसांकडून ज्येष्ठ नागरिकांची लूट

तोतया पोलिसांकडून ज्येष्ठ नागरिकांची लूट
पीडितामध्ये सहाय्यक पोलिसाचा समावेश
पनवेल, ता. १४ (वार्ताहर) : पोलिस असल्याची बतावणी करून ज्येष्ठ नागरिकांची फसवणूक करणाऱ्या भामट्यांनी गत दोन दिवसांमध्ये कामोठे आणि सीबीडी भागात राहणाऱ्या दोन ज्येष्ठ नागरिकांजवळचे तब्बल तीन लाख ४० हजार रुपये किमतीचे दागिने लुटल्याची घटना समोर आली आहे. विशेष म्हणजे फसवणूक झालेल्या ज्येष्ठ नागरिकांमध्ये मुंबई पोलिस दलातील सहाय्यक पोलिस उपनिरीक्षकाचा समावेश आहे. कामोठे आणि सीबीडी पोलिसांनी या घटनांची नोंद करून त्यांचा शोध सुरू केला आहे.
कामोठे येथे शनिवारी सकाळी घडलेल्या पहिल्या घटनेत दोघा तोतया पोलिसांनी मुंबई पोलिस दलातून सेवानिवृत्त झालेले सहाय्यक पोलिस उपनिरीक्षक गजानन चौगुले (वय ६४) यांचे दोन लाख ७० हजारांचे दागिने लुबाडून नेले. गत शनिवारी चौगुले हे सकाळी पावणेअकरा वाजण्याच्या सुमारास सेक्टर-३२ येथील कब्रस्थानच्या दिशेने जाणाऱ्या रस्त्यावरून फिरण्यासाठी गेले होते. या वेळी त्यांच्याजवळ रेनकोट घालून आलेल्या एका भामट्याने पोलिस असल्याचे सांगितले. तसेच त्यांना पोलिस कार्ड दाखवून परिसरात गुन्हे होत असल्यामुळे त्यांना तपासणीसाठी नेमल्याचे सांगितले. शिवाय चौगुले यांना त्यांच्या जवळचे दागिने काढून दाखवण्यास सांगितले, मात्र चौगुले यांनी त्यास नकार दिला असता, तोतया पोलिसाने त्यावरील नंबर तपासण्याच्या बहाण्याने चौगुले यांना त्यांचे दोन लाख ७० हजारांचे दागिने काढण्यास भाग पाडले. या वेळी भामट्याने जवळच उभ्या असलेल्या त्याच्या साथीदाराला बोलावून त्यालादेखील दागिने तपासण्यास सांगितले. या वेळी दुसऱ्या भामट्याने दागिने तपासल्यानंतर ते बॅगेमध्ये ठेवण्यास सांगितले. या वेळी चौगुले यांनी दोघा भामट्यांकडे आपले दागिने परत मागितले असता, त्‍यांना ढकलून पळ काढला. त्यानंतर चौगुले यांनी आपल्या मुलीसह कामोठे पोलिस ठाणे गाठून तक्रार दाखल केली.
...............
खून झाल्याचे सांगून फसवणूक
सीबीडी सेक्टर-११ परिसरात राहणारे परशुराम परब (वय ८२) हे रविवारी सकाळी १० वाजण्याच्या सुमारास चालण्यासाठी सरोवर विहार येथे गेले होते. या वेळी त्यांच्याजवळ आलेल्या एका भामट्याने पोलिस उपनिरीक्षक असल्याचे सांगून पुढे हत्या झाल्याचे सांगितले. तसेच त्यांच्याकडे असलेले सोने काढून पिशवीत ठेवण्यास बजावले. त्यानुसार परब यांनी त्यांच्या गळ्यातील १० ग्रॅम वजनाची ७० हजार रुपये किमतीची सोन्याची चेन काढली असता, भामट्याने त्यांची सोन्याची चेन कागदामध्ये बांधून देण्याचा बहाणा करत हातचलाखीने लांबवली. त्यानंतर रिकामा कागद त्यांना देऊन त्या ठिकाणावरून पलायन केले. काही वेळानंतर आपली फसवणूक झाल्याचे लक्षात आल्यानंतर परब यांनी सीबीडी पोलिस ठाण्यात तक्रार दाखल केली.