उत्तनच्या अनधिकृत बांधकामांचा मुद्दा विधानसभेत

भाईंदर, ता. १४ (बातमीदार) : उत्तन येथे वाढत असलेल्या अनधिकृत बांधकामांचा मुद्दा विधिमंडळाच्या अधिवेशनात उपस्थित झाला आहे. मिरा-भाईंदरचे आमदार नरेंद्र मेहता यांनी लक्षवेधी सूचनेद्वारे या समस्येला वाचा फोडली आहे. महापालिकेच्या अधिकाऱ्यांच्या आर्थिक हितसंबंधांमुळे या भागात अनधिकृत बांधकामे वाढत असल्याचा थेट आरोप मेहता यांनी केला आहे.

उत्तन परिसराला नैसर्गिक सौंदर्य लाभले आहे. या ठिकाणी समुद्रकिनारा, पुरातन धार्मिक स्थळे असल्याने पर्यटकही मोठ्या संख्येने उत्तनमध्ये येतात. उत्तनमध्ये सरकारी जमिनी मोठ्या प्रमाणात आहेत, तसेच उत्तनचा बराचसा भाग सीआरझेड व ना विकास क्षेत्रामध्ये मोडत आहे, मात्र त्यानंतरही या ठिकाणी मोठ्या प्रमाणात अनधिकृत बांधकामे केली जात आहेत. ही बांधकामे केली जात असताना वृक्षतोडही होत आहे. काही भूमाफिया राजकीय आशिर्वादाने सरकारी जागा लाटून त्यावर अनधिकृत बांधकामे करत आहेत. महापालिकेने मध्यंतरी कारवाई करून काही बांधकामे उद्ध्वस्त केली होती. त्यानंतरही या भागात मोठ्या प्रमाणात अनधिकृत बांधकामे आहेत. हा मुद्दा मेहता यांनी लक्षवेधी सूचनेद्वारे विधानसभेत उपस्थित केला आहे.

महापालिकेचे प्रभाग अधिकारी व कनिष्ठ अभियंता यांचे अनधिकृत बांधकाम करणाऱ्यांशी आर्थिक हितसंबंध असल्यानेच या ठिकाणी अनधिकृत बांधकामे होत असल्याचा आरोप मेहता यांनी लक्षवेधीद्वारे केला आहे. उत्तनमध्ये होत असलेल्या अनधिकृत बांधकांमांमुळे स्थानिकांमध्ये मोठा असंतोष पसरत आहे. यासाठी या अनधिकृत बांधकांवर कारवाई करून संबंधितांवर एमआरटीपी अंतर्गत गुन्हे दाखल करण्यात यावेत, अशी मागणी मेहता यांनी केली आहे.

या लक्षवेधी सूचनेवर उपमुख्यमंत्री एकनाथ शिंदे निवेदन करणार असल्याने अनधिकृत बांधकामांविषयीची सर्व माहिती पाठविण्याचे आदेश राज्य सरकारच्या नगारविकास विभागाकडून मिरा-भाईंदर महापालिकेला देण्यात आले आहेत.