हॉटेल अँड बार व्यावसायिकांचे करवाढीविरोधात निषेध

हॉटेल अँड बार व्यावसायिकांकडून करवाढीविरोधात निषेध
वाशी, ता. १४ (बातमीदार) ः नवी मुंबई हॉटेल ओनर्स असोसिएशनच्या वतीने ता. १४ रोजी सोमवारी वाशी येथील छत्रपती शिवाजी महाराज चौकात राज्य शासनाकडून मद्यविक्री धोरणामुळे वाढवण्यात आलेल्या करवाढीविरोधात निषेध आंदोलन करण्यात आले, तर सोमवारी नवी मुंबईतील हॉटेल अ‍ॅड बार बंद ठेवण्यात आले होते. या वेळी शासनाविरोधात फलक उंचावून निषेध व्यक्‍त करण्यात आला. या आंदोलनात नवी मुंबई हॉटेल ऑनर्स असोएिशनचे अध्यक्ष दयानंद शेट्टी, उप अध्यक्ष डॉ. शिव मुदिगेरे आदी हॉटेल व्यावसायिक सहभागी झाले होते.
सद्यःस्थितीत राज्य शासनाकडून दारू कर हा दुप्पट करण्यात आला असून, परवाना शुल्क १५ टक्के वाढवले आहे. त्याचप्रमाणे एक्‍ससाईज ड्युटीमध्येदेखील ६० टक्के वाढ करण्यात आली आहे. यामुळे हॉटेल व्यावसायिकांनादेखील या करवाढीचा फटका बसलेला आहे. या करवाढीविरोधात महाराष्ट्र परमिट रूम अँड बार यांच्याकडून परमिट बार बंदची हाक देण्यात आली होती. त्यानुसार सोमवारी नवी मुंबईत हॉटेल अ‍ँड बार बंद ठेवण्यात आले होते. नवी मुंबईत जवळपास ६०० बार असून, ते बंद ठेवण्यात आले होते. सरकारच्या मद्यविक्री धोरणामुळे हॉटेल अ‍ँड बार व्यवसाय बंद पडण्याचा धोका निर्माण झाला आहे. यासंदर्भात नवी मुंबई हॉटेल ऑनर्स असोसिएशनचे अध्यक्ष दयानंद शेट्टी यांनी शासनाच्या करवाढीविरोधात संताप व्यक्त केला आहे. या दरवाढीचा फटका हॉटेल व्यावसायिकांना बसला आहे. त्यामुळे ग्राहकांचे प्रमाणदेखील कमी होत असल्याने व्‍यवसाय कसा करावा, असा सवाल हॉटेल व्‍यावसायिकांनी केला आहे.