नववीच्या वर्गातील विद्यार्थ्यांची नियतकालिक चाचणीवरून संभ्रम,

नियतकालिक चाचणीत
नववीचा समावेश नाही!
शिक्षक, संस्थाचालकांमध्ये संभ्रम
मुंबई, ता. १४ ः समग्र शिक्षा अभियानाच्या माध्यमातून राज्यभरातील शाळांमध्ये नियतकालिक मूल्यांकन चाचणीअंतर्गत पायाभूत चाचणीचे वेळापत्रक नुकतेच जाहीर झाले. त्यात दुसरी ते आठवीपर्यंतच्या चाचण्यांचा समावेश आहे; मात्र त्यात नववीचा उल्लेख नसल्याने राज्यातील शिक्षक, संस्थाचालकांमध्ये संभ्रम निर्माण झाला आहे.
दहावीपूर्वी नववीच्या विद्यार्थ्यांची नियतकालिक चाचणी घेऊन अध्यापनात मागे असलेल्या विद्यार्थ्यांवर लक्ष केंद्रित करता येतात किंवा त्यासाठी अन्य पर्यायही शोधता येतात; मात्र या चाचणीतून नववीला डावलण्यात आल्याने शिक्षकांनी सवाल उपस्थित केला आहे. राज्य शैक्षणिक संशोधन व प्रशिक्षण परिषदेचे संचालक राहुल रेखावार यांनी नववीचा समावेश प्रशासकीय कारणामुळे करण्यात आला नसल्याचे सांगितले.
---
मूल्यमापन चाचणी काय आहे?
राज्य शैक्षणिक संशोधन व प्रशिक्षण परिषदेच्या माध्यमातून राज्यातील सर्व शाळांमध्ये ६ ते ८ ऑगस्टदरम्यान नियतकालिक चाचण्या घेतल्या जाणार आहेत. त्यानंतर संकलित मूल्यमापन चाचणी-१ ऑक्टोबर किंवा नोव्हेंबरमध्ये आणि संकलित मूल्यमापन चाचणी-२ ही एप्रिल २०२६मध्ये घेतली जाणार आहे. पायाभूत चाचणीमध्ये इयत्ता दुसरी ते आठवीच्या विद्यार्थ्यांचा समावेश असून, प्रथम भाषा, गणित आणि तृतीय भाषा (इंग्रजी) या विषयांवर आधारित असेल. विद्यार्थ्यांच्या अध्ययन क्षमतेचे मूल्यमापन करून शैक्षणिक सुधारणा करण्याचा या चाचणीचा उद्देश आहे; मात्र यात नववीचा समावेश नसल्याने आश्चर्य व्यक्त केले जात आहे.