बेकायदा इमारतीतील रहिवाशांचे मंगळवारी आंदोलन

बेकायदा इमारतीतील रहिवाशांचे मंगळवारी आंदोलन
सकाळ वृत्तसेवा
डोंबिवली, ता. १४ : बनावट कागदपत्रांद्वारे महारेराचा नोंदणी क्रमांक मिळवला, तसेच इमारती अधिकृत असल्याचे दाखवून भूमाफियांनी सामान्य नागरिकांची फसवणूक केली आहे. न्यायालयाने या इमारतींवर कारवाईचे आदेश दिले आहेत. आता इमारती वाचविण्यासाठी कोणीही पुढे येत नसल्याने आपले घर वाचविण्यासाठी डोंबिवलीतील ६५ बेकायदा इमारतींमधील रहिवाशांनी मंगळवारी (ता. १५) मुंबईत आझाद मैदान येथे धरणे आंदोलन करण्याचा निर्णय घेतला आहे.
बेकायदा इमारती उभारणारे भूमाफिया, बेकायदा इमारतींची बनावट कागदपत्रे बनविणारे भूमाफिया कल्याण डोंबिवली शहरात मोकाट फिरत आहेत. या भूमाफियांची नावे ६५ बेकायदा इमारतींमधील रहिवाशांनी सरकार, पोलिसांना निवेदनाच्या माध्यमातून दिली आहेत. तरीही या भूमाफियांवर कोणतीही कारवाई होत नाही, अशी रहिवाशांची तक्रार आहे. याऊलट आयुष्याची पुंजी लावून या इमारतींमध्ये घर खरेदी करणाऱ्यांना पालिका सतत नोटिसा पाठवून त्यांचे जगणे हैराण करून ठेवत आहे, अशी खंत रहिवासी व्यक्त करत आहेत. बेकायदा बांधकामे विषयावर न्यायालये आक्रमक भूमिका घेतल्याने कोणीही लोकप्रतिनिधी या विषयावर उघडपणे, लिखित स्वरूपात बोलण्यास तयार नाही. चालू विधिमंडळ अधिवेशनात कोणीही आमदाराने हा विषय उपस्थित केलेला नाही. त्यामुळे सरकारने या गंभीर विषयाकडे लक्ष वेधण्यासाठी ६५ इमारतींमधील रहिवाशांनी आझाद मैदान येथे धरणे आंदोलन करण्याचा निर्णय घेतला आहे.