वसईमध्ये तहसीलदारांना निवेदन

नालासोपारा, ता. १४ (बातमीदार) : वॅट, उत्पादन शुल्क, वार्षिक परवाना शुल्कातील सरकारच्या अतिरिक्त करवाढीविरोधात वसईतील हॉटेल्स व्यावसायिक एकवटून तीव्र संताप व्यक्त केला. हॉटेल असोसिएशनने वसई तालुक्यातील आज (ता. १४) सर्व हॉटेल्स बंद करून अतिरिक्त करवाढीविरोधात आपल्या मागण्यांचे निवेदन तहसीलदारांमार्फत सरकारला दिले आहे.

पुरे झाली सहनशीलता अशा आशयाचे फलक हातात घेऊन हॉटेल व्यावसायिक असोसिएशनचे अध्यक्ष प्रीतम सिंग यांच्या नेतृत्वाखाली आज रस्त्यावर उतरले होते. सर्व हॉटेल्स व्यावसायिक आज दुपारी १२ वाजता तहसील कार्यालयावर शांततेत मोर्चा काढणार होते, मात्र पोलिसांनी त्याला परवानगी न दिल्याने त्यांनी मोर्चा रद्द करून दत्तानी हॉल येथे जमून करवाढीच्या निर्णयाचा विरोध केला.
---
वाड्यात बार बंद
वाडा (बातमीदार) : राज्य सरकारने दारूवर ६० टक्के उत्पादन शुल्कात वाढ केल्याच्या निषेधार्थ आज वाडा तालुक्यातील सर्व बार मालकांनी बार बंद ठेवून सरकारच्या या निर्णयाचा निषेध केला. या वेळी तालुक्यातील सर्व परमिट रूम बार ॲण्ड रेस्टॉरंट बंद ठेवण्यात येऊन सरकारच्या या निर्णयाचा निषेध नोंदवला.
---