सहा शाळांच्या दुरुस्तीचा मार्ग मोकळा

अंबरनाथ, ता. १४ (बातमीदार) : अंबरनाथ नगरपालिका शाळांच्या दुरुस्तीला अखेर मुहूर्त मिळाला आहे. नादुरुस्त आणि गैरसोयी असणाऱ्या सहा शाळांच्या दुरुस्तीसाठी प्रशासनाने जाहिरात प्रसिद्ध केली आहे. यात अंदाजे ८० लाख रुपये खर्चाची निविदा काढण्यात आली आहे.
अंबरनाथ नगरपालिका संचलित १७ आणि एक माध्यमिक माध्यमाची अशा १८ शाळांचा समावेश आहे. काही शाळांतील पटसंख्या समाधानकारक आहे. लोकल बोर्ड नावाने प्रसिद्ध असलेली एक नंबर शाळेच्या नूतनीकरण केलेल्या अद्ययावत शाळेचे जून महिन्यात विद्यार्थ्यांचा प्रवेश झाला. शिवमंदिर परिसरातील नऊ नंबर शाळेमध्ये गैरसोयींच्या वातावरणात विद्यार्थी शिकत होते. याबाबत शाळेच्या समस्यांवर वृत्तपत्रांनी प्रकाशझोत टाकताच तेथील गैरसोयींचा डोंगर प्रशासनाने त्वरित दूर केला. यामुळे विद्यार्थ्यांसह शिक्षकांना दिलासा मिळाला. अशाच प्रकारच्या गैरसोयी तीन, चार, सहा, नऊ; तसेच १६ क्रमांक शाळांतही असल्याने पालिका शिक्षणाधिकाऱ्यांच्या वतीने प्रशासनाच्या निदर्शनास आणून दिल्या.
शाळांतील दुरुस्त्यांबाबत शिक्षण विभागाच्या प्रशासनाधिकारी जयश्री धाटयगुडे यांनी शाळांतील दुरुस्त्यांबाबतचा लेखी अहवाल पालिकेला दिला होता. या अहवालानुसार बांधकाम, पाणीपुरवठा, आरोग्य आणि विद्युत आदी खातेप्रमुखांकडून आवश्यक त्या उपाययोजना करण्याबाबत सूचित करण्यात आले होते. त्यानुसार पालिका प्रशासनाने उपरोक्त शाळांच्या दुरुस्तीसाठी ८० लाख १३ हजार ५४७ रुपये खर्चाची निविदा प्रसिद्ध केली आहे. या अंतर्गत शाळांची दुरुस्ती करण्याचा निर्णय प्रशासनाच्या वतीने घेण्यात आला आहे.

अंतर्गत कामे होणार
बहुतेक शाळांमध्ये शाळेला संरक्षक भिंती बांधणे, तुटलेली स्वच्छतागृहांची दारे बसवणे, खेळासाठी मैदानाचे सपाटीकरण करणे, नादुरुस्त विद्युत उपकरणांची दुरुस्ती करणे, तुटलेल्या अवस्थेतील दरवाजे आणि खिडक्या बसवून देणे शाळेला नामफलक लावणे, पंखे, दिव्यांची सोय करणे आदी मागण्या करण्यात आल्या आहेत. आता प्रशासनातर्फे रीतसर जाहिरात काढण्यात आल्याने पालिकेच्या सर्व शाळांतील दुरुस्तीची कामे होण्याचा मार्ग मोकळा झाला आहे.