वैद्यकीय शिक्षणासाठी खिसा रिकामा

वैद्यकीय शिक्षणासाठी खिसा रिकामा
अभिमत विद्यापीठात तब्बल एक कोटींचा खर्च
मुंबई, ता. १५ ः राज्यातील सरकारी वैद्यकीय महाविद्यालयांमध्ये वैद्यकीय पदवी शिक्षणासाठी वर्षांकाठी एक लाख ३७ हजार खर्च करावे लागतात. असे असताना राज्यातील अभिमत विद्यापीठातदेखील वैद्यकीय शिक्षणासाठीचा खर्च हा वर्षाला १८ ते २५ लाखांपर्यंत असून, चार वर्षांसाठी तब्बल एक कोटींपर्यंत होत असल्याने सर्वसामान्यांचा खिसा रिकामा होण्याची वेळ आली आहे.
वैद्यकीय शिक्षणमंत्री हसन मुश्रीफ यांनी विधान परिषदेत उपस्थित केलेल्या तारांकित प्रश्नाच्या उत्तरात यासंदर्भातील माहिती दिली आहे. त्यानुसार शासकीय, महापालिका वैद्यकीय महाविद्यालयांमध्ये प्रतिवर्षाला एक लाख ३८ हजार रुपये इतका खर्च येतो, तर खासगी विनाअनुदानित वैद्यकीय महाविद्यालयांमध्ये हाच खर्च आठ लाख ते १७ लाख रुपये प्रतिवर्ष इतका असतो, तर अभिमत विद्यापीठाच्या वैद्यकीय महाविद्यालयांत प्रतिवर्षाकाठी १८.५० लाख ते २५ लाखांचा असा साधारणपणे एक कोटीपर्यंत खर्च होत असल्याची माहिती वैद्यकीय शिक्षण मंत्र्यांनी लेखी उत्तरात दिले आहे.
-------------------------------------
...तरच १०० टक्के शिष्यवृत्ती
राज्यातील विविध शासकीय शिष्यवृत्ती योजनांतर्गत शासकीय, महापालिका आणि खासगी विनाअनुदानित वैद्यकीय महाविद्यालयात कॅप प्रवेश फेरीद्वारे प्रवेश घेतलेल्या विद्यार्थ्यांच्या कुटुंबाचे उत्पन्न रुपये आठ लाख व त्यापेक्षा कमी आहे. अशा विद्यार्थ्यांना खुला, ईडब्ल्यूएस, ओबीसी प्रवर्गातील मुलांना ५० टक्के आणि मुली १०० टक्के तसेच एससी, एसटी, एनटी, व्हीजेएनटी प्रवर्गातील मुला-मुलींना १०० टक्के शिष्यवृत्ती प्रदान केली जाते. तसेच राज्यातील अभिमत विद्यापीठ वैद्यकीय महाविद्यालयात प्रवेश घेतलेल्या विद्यार्थ्यांच्या कुटुंबाचे वार्षिक उत्पन्न आठ लाख व त्यापेक्षा कमी आहे, अशा विद्यार्थ्यांना विद्यार्थीसंख्या भारित सरासरी सूत्रानुसार शिक्षण शुल्काची प्रतिपूर्ती करण्यात येत असल्याची माहिती आहे.