२० कोटींच्या शौचालयावरून वाद

सकाळ वृत्तसेवा
मुंबई, ता. १५ ः शहरातील २० कोटींच्या शौचालय घोटाळ्याची चौकशी लाचलुचपत प्रतिबंधक विभागामार्फत (एसीबी) करण्याची मागणी भाजपचे नगरसेवक मकरंद नार्वेकर यांनी पालिका आयुक्तांकडे केली आहे. शौचालयावरील खर्च करदात्यांच्या पैशांची लूट असल्याचेही त्यांनी म्हटले आहे.
मुंबई शहरात १४ ‘महत्त्वाकांक्षी शौचालये’ बांधण्याचे काम हाती घेतले आहे. याअंतर्गत ए वॉर्डमधील पाच ठिकाणांचा लायन गेट, ओव्हल मैदान आणि विधान भवन समावेश आहे. या ठिकाणी प्रत्येक शौचालयाची किंमत १.२५ कोटी ते १.७५ कोटींदरम्यान आहे. हा सार्वजनिक निधीचा गैरवापर असून, रस्त्यांची दयनीय स्थिती, झोपडपट्ट्यांमध्ये मूलभूत सुविधांचा अभाव असताना असा खर्च करणे अयोग्य असल्याचे नार्वेकर यांनी म्हटले आहे.
--------------------------------------------
मोबाईल शौचालयांचा पर्याय
दक्षिण मुंबईच्या सौंदर्याला बाधा पोहोचवणाऱ्या कायमस्वरूपी मोठ्या शौचालयांऐवजी पालिकेने युरोपियन शैलीतील मोबाईल शौचालयांचा विचार करायला हवा होता.  एका युनिट्सची किंमत फक्त २-५ लाख रुपये असून, स्थलांतराची लवचिकता, किमान पर्यावरणीय परिणाम आणि जाहिरातींच्या उत्पन्नाद्वारे सार्वजनिक-खासगी भागीदारीसाठी संधी उपलब्ध करून देतात, असेही मकरंद नार्वेकर यांनी निवेदनात म्हटले आहे.