ठाण्यात कारखाली चिरडून श्वानाचा मृत्यू

ठाण्यात कारखाली चिरडून श्वानाचा मृत्यू
सकाळ वृत्तसेवा
ठाणे, ता. १४ : लोढा लक्झेरिया या इमारतीच्या मुख्य प्रवेशद्वारासमोर बसलेल्या एका मादी श्वानाला कारखाली चिरडण्यात आल्याची घटना रविवारी (ता. १३) सायंकाळी घडली. याप्रकरणी श्वानाच्या मृत्यूला कारणीभूत ठरलेल्या कारचालकाविरोधात गुन्हा दाखल करण्यात आल्याची माहिती कापूरबावडी पोलिसांनी दिली.
तक्रारदार निधी सावंत (वय ५०) या संबंधित सोसायटीत ११ वर्षांपासून राहात आहेत. या सोसायटीच्या परिसरात एकूण २० श्वान असून, त्यांना दररोज खायला देणे, त्यांची देखभाल करण्‍याचे काम सावंत या करत आल्या आहेत. यापैकी एक श्वान सोसायटीच्या मुख्य प्रवेशद्वारासमोर रविवारी (ता. १३) सायंकाळी बसलेले असताना एका कारचालकाने या श्‍वानाला चिरडले. या घटनेची माहिती मिळताच सावंत यांनी घटनास्थळी धाव घेत, जखमी श्वानाला डॉक्टरकडे नेले असता, येथील डॉक्टरांनी या श्वानाला मृत घोषित केल्याचे तक्रारीत नमूद करण्यात आले आहे. याप्रकरणी त्या कारचालकाविरोधात गुन्हा दाखल करण्यात आला आहे. पुढील तपास कापूरबावडी पोलिस करीत आहेत.