शास्त्रीनगरमधील अनधिकृत बांधकामांवर कारवाई

शास्त्रीनगरमधील अनधिकृत बांधकामांवर कारवाई
सकाळ वृत्तसेवा
ठाणे, ता. १४ : शास्त्रीनगर येथील अनधिकृत बांधकामासंदर्भात टीकेची झोड उठताच ठाणे पालिकेच्या अतिक्रमण नियंत्रण विभागाला जाग आली आहे. पालिकेने सोमवारी (ता. १४) लोकमान्य सावरकरनगर परिसरातील शास्त्रीनगरमधील अनधिकृत बांधकामावर कारवाई केली. या बांधकामांसदर्भात माजी ज्येष्ठ नगरसेवक हणमंत जगदाळे यांनी पालिका आयुक्तांना पत्र लिहिले होते. त्यावर अखेर कारवाईला सुरुवात झाली आहे.
अनधिकृत बांधकामांवरून ठाणे महापालिकेचा कारभार सध्या गाजत आहे. अशातच सत्ताधारी शिवसेना शिंदे गटाचे माजी ज्येष्ठ नगरसेवक हणमंत जगदाळे यांनी शास्त्रीनगर येथे सुरू असलेल्या अनधिकृत बांधकांकडे लक्ष वेधले होते. ही बांधकामे तोडण्याचे निर्देश उपमुख्यमंत्री एकनाथ शिंदे यांनीही दिले होते. पण त्याकडे कानाडोळा करीत पालिका या अनधिकृत बांधकामांना अभय देत असल्याची बाब जगदाळे यांनी आयुक्तांच्या लक्षात आणून दिली. यासंदर्भात ‘सकाळ’नेही सोमवारी वृत्त (ता. १४) प्रसिद्ध केले होते. पालिका आयुक्त सौरभ राव यांनी या तक्रारीची तत्काळ दखल घेत सोमवारी शास्त्रीनगर नाल्यावरील चार गाळे पूर्णपणे जमीनदोस्त केले. येथील ज्येष्ठ नागरिक कट्ट्यालगत, हत्तीपुलाजवळ, शास्त्रीनगर येथे असलेले वीट-सिमेंटचे आणि पिलर व त्याखालील सिमेंटचा कोबा तसेच गाळ्यासाठी उभारण्यात आलेले पाच भिंतींचे वीट-सिमेंटचे बांधकाम पाडले. ही कारवाई अतिक्रमण नियंत्रण विभागामार्फत उपायुक्त शंकर पाटोळे यांच्या मार्गदर्शनाखाली लोकमान्य सावरकनगर प्रभाग समितीचे सहाय्यक आयुक्त सोमनाथ बनसोडे व अधिकारी कर्मचारी यांच्या उपस्थितीत करण्यात आली.