वसईच्या चिंचोटी धबधब्यात दोघांचा बुडून मृत्यू

वसईच्या चिंचोटी धबधब्यात दोघांचा बुडून मृत्यू

नालासोपारा, ता. १४ (बातमीदार) : वसईच्या चिंचोटी धबधब्यावर सहलीसाठी आलेल्या गोरेगावच्या दोन तरुणांचा सोमवारी (ता. १४) बुडून मृत्यू झाला. वसई विरार महापालिकेच्या अग्निशमन दलाने घटनास्थळी धाव घेत या दोघांचे मृतदेह पाण्याबाहेर काढले. याप्रकरणी नायगाव पोलिस ठाण्यात अकस्मात मृत्यूची नोंद करण्यात आली आहे.
प्रेम प्रल्हाद शहजराव (वय २२) व सुशील भारत ढबाले (वय २४, दोघेही रा. अशोक नगर, गोरेगाव पूर्व) हे महाविद्यालयीन विद्यार्थी होते. गोरेगाव येथून एका कॉलेजमधील सहा जणांचा समूह वसईच्या चिंचोटी धबधब्यावर सहलीसाठी आला होता. या वेळी धबधब्यात पोहण्यासाठी उतरलेल्या प्रेम व सुशील याला पाण्याचा अंदाज न आल्याने ते डोहात बुडाले. या वेळी याची माहिती पोलिसांमार्फत वसई विरार महापालिकेच्या जवानांना मिळाली. त्यानंतर वसई विरार महापालिकेच्या अग्निशमन दलाच्या जवानांनी धबधब्यापर्यंत दोन तासांची पायपीट करीत घटनास्थळी पोहोचत या दोघांचे मृतदेह पाण्याबाहेर काढले. दोन्ही मृतदेह शवविच्छेदनासाठी नायगाव पोलिसांच्या ताब्यात देण्यात आले आहेत.