भिवंडीतील स्मशानभूमीजवळ हुक्का पार्लर सुरू

भिवंडी, ता. १४ (बातमीदार) : सरकारने बंदी केली असतानाही भिवंडी शहरात हुक्कापार्लर शहर आणि ग्रामीण भागात सर्रासपणे अनेक ठिकाणी उघडपणे अथवा लपून-छपून सुरू आहेत. शांतीनगर पोलिस ठाण्याच्या हद्दीत चक्क कासिमपूर स्मशानभूमीजवळही बेकायदा हुक्कापार्लर सुरू होता. त्यावर गुन्हे शाखा युनिट-२ भिवंडीच्या पोलिस पथकाने छापा टाकून सहा जणांना ताब्यात घेतले.
दोन वर्षांपासून कासिमपूर कब्रस्तानाजवळ हे हुक्का पार्लर गुप्तपणे चालवले जात होते. येथे अल्पवयीन मुलांनाही व्यसनी बनवले जात होते. हा संपूर्ण परिसर झोपडपट्टी असल्याने लहान मुले सहजपणे या पार्लरचे ग्राहक बनतात. या कारवाईत पोलिसांनी गैबीनगर रहिवासी शेरू (व्यवस्थापक), आसिफ निजामुद्दीन खान, आकिब अब्दुल अजिज मोमीन, मोहम्मद नियाज जिब्रिल अन्सारी, जिब्राहिल मोहम्मद तस्लीम मन्सूरी आणि जमील मोहम्मद महमूद अन्सारी यांना ताब्यात घेतले. त्यांच्या ताब्यातून ९,६०० रुपये किमतीचे तंबाखूमिश्रित हुक्का आणि इतर साहित्य जप्त करण्यात आले आहे.
महाराष्ट्रात तंबाखूयुक्त हुक्का पूर्णपणे बंदी आहे, तरीही भिवंडीतील पद्मानगर, कणेरी, खोंका कम्पा‍उंड, नेहरूनगर, नारपोली आणि ग्रामीण भागातील ढाब्यांमध्ये बेकायदा हुक्कापार्लर सुरू आहेत. स्थानिक नागरिकांनी या कारवाईमुळे समाधान व्यक्त केले आहे. पोलिसांनी आरोपींविरुद्ध सिगारेट आणि तंबाखू उत्पादने कायदा अंतर्गत गुन्हा दाखल केला आहे.