मालवाहतूक टेम्पोमधून चिमुकल्यांचा प्रवास

मालवाहतूक टेम्पोतून चिमुकल्यांचा प्रवास
सकाळ वृत्तसेवा
डोंबिवली, ता. १५ : अंबरनाथ येथील शालेय विद्यार्थ्यांच्या अपघाताची घटना ताजी असतानाच कल्याण येथील एका व्हिडिओने साऱ्यांचे लक्ष वेधून घेतले आहे. एका मालवाहू टेम्पोतून विद्यार्थ्यांचा प्रवास होत असून, याचा व्हिडिओ समाजमाध्यमात व्हायरल होत आहे. या टेम्पोतून विद्यार्थ्यांच्या सुरक्षित प्रवासाची कोणतीही काळजी घेतली गेली नसल्याचे दिसत आहे.

कल्याण पूर्वेतील पत्री पुलाजवळील हा व्हिडिओ असल्याचे दिसून येत आहे. शाळेतील विद्यार्थ्यांची चक्क एका मालवाहतूक करणाऱ्या टेम्पोतून शाळेत ने-आण केली जात आहे. या टेम्पोत विद्यार्थ्यांसाठी कोणतीही योग्य आसन व्यवस्था नाही. त्याचे दरवाजेही पूर्णपणे बंद होत नाहीत. धक्कादायक म्हणजे मुलांच्या सुरक्षिततेसाठी एकही सहाय्यक सोबत नाही. चिमुकले विद्यार्थी केवळ टेम्पोच्या लोखंडी पट्ट्या धरून उभे आहेत. जर हा टेम्पो भरधाव वेगात असताना थोडासाही असंतुलित झाला, तर ही निष्पाप मुले थेट रस्त्यावर फेकली जातील. यामुळे भीषण अपघाताची भीती व्यक्त होत आहे. आता आरटीओ आणि शाळा प्रशासन याकडे आता किती गांभीर्याने कारवाई करते, हे पाहावे लागेल.