शासकीय रुग्णालयामागे गांजाविक्री

उल्हासनगर, ता. १५ (वार्ताहर) : उल्हासनगरच्या शासकीय रुग्णालयामागे असलेल्या परिसरातून गांजाची विक्री करण्यासाठी आलेल्या एका व्यक्तीला अटक करण्यात आली आहे. त्याच्याकडून १६०० ग्रॅम वजनाचा २२ हजार रुपये किमतीचा गांजा हस्तगत करण्यात आला आहे. आरोपीने अमली पदार्थ कुणाकडून घेतले आणि कोणाला विक्रीसाठी आणले होते, याचा सखोल तपास पोलिसांकडून सुरू आहे.
मध्यवर्ती पोलिस ठाण्याच्या हद्दीत १२ जुलैला गस्त घालत असलेल्या गुन्हे शोध पथकाचे पोलिस नाईक सचिन पाटील यांच्यामार्फत माहिती मिळाली की शासकीय मध्यवर्ती रुग्णालयाच्या मागील बाजूस मोकळ्या जागेत एक व्यक्ती गांजा विक्रीसाठी येणार आहे. या माहितीच्या आधारे वरिष्ठ पोलिस निरीक्षक शंकर आवताडे आणि पोलिस निरीक्षक (गुन्हे) उमेश सावंत यांच्या मार्गदर्शनाखाली सहाय्यक पोलिस निरीक्षक राकेश शेवाळे यांच्या नेतृत्वात पथकाने तत्काळ सापळा रचला. तेथे नवीन रामदास चिंचोळे (वय ३५) हा पिशवीसह संशयास्पद हालचाली करताना पोलिसांना दिसला. पोलिसांनी त्याला ताब्यात घेत अंगझडती केली असता त्याच्याकडे १६०० ग्रॅम गांजा आढळून आला. त्याच्याविरुद्ध मध्यवर्ती पोलिस ठाण्यात गुन्हा दाखल केला आहे. त्याला सोमवारी (ता. १४) न्यायालयात हजर केले असता १६ जुलैपर्यंत पोलिस कोठडी सुनावण्यात आली. त्याने गांजा कुणाकडून विकत घेतला, कोणाला विक्री करत होता, त्याचा परिसरात आणखी कुणाशी संपर्क आहे का, याची चौकशी सुरू आहे.