पालकमंत्री पदाबाबत लवकर निर्णय होणे आवश्यक

पालकमंत्रिपदाबाबत लवकर निर्णय होणे आवश्यक
खासदार तटकरे यांचे मत; नियोजन समितीच्या बैठका रखडल्या
अलिबाग, ता. १५ (वार्ताहर) ः रायगड जिल्ह्यातील पालकमंत्रिपद गेल्या अनेक महिन्यांपासून प्रलंबित आहे. पालकमंत्रिपद हे घटनेने निर्माण केले आहे. जिल्ह्यात पालकमंत्री असणे आवश्यक आहे. लवकरच हा निर्णय झाला पाहिजे, असे मत राष्ट्रवादी काँग्रेसचे प्रदेशाध्यक्ष सुनील तटकरे यांनी व्यक्त केले. अलिबागमधील राष्ट्रवादी काॅंग्रेसच्या पक्ष कार्यालयात सोमवारी (ता. १४) पत्रकार परिषदेचे आयोजन करण्यात आले होते. त्या वेळी ते बोलत होते.
जिल्ह्यातील पालकमंत्रिपदावरून राजकारण तापले आहे. पालकमंत्री नसल्याने जिल्हा नियोजन समितीच्या बैठकाही रखडल्या आहेत. जिल्हा नियोजन समितीचा निधी वितरित करण्याचा अधिकार राज्य पातळीवर राहणार आहे. त्यामुळे हा वाद अधिकच विकोपाला गेला असल्याचे चित्र आहे. पालकमंत्रिपदावरून सोमवारी खासदार सुनील तटकरे यांना विचारणा केली असता, पालकमंत्रिपद हे घटनेने निर्माण केले आहे. जिल्हा नियोजन समितीचे अध्यक्ष म्हणून पालकमंत्री यांची महत्त्वाची भूमिका असते. पालकमंत्रिपद कोणाला द्यायचे हे मुख्यमंत्री, उपमुख्यमंत्री ठरवतील. यावर लवकरच निर्णय झाला पाहिजे, असे मत खासदार तटकरे यांनी व्यक्त केले. त्यामुळे सरकार काय भूमिका घेणार याकडे लक्ष लागून राहिले आहे. जिल्ह्यात मंत्री आदिती तटकरे यांना पालकमंत्रिपद मिळू नये, म्हणून शिवसेनेतील तिन्ही नेते जीवाची बाजी लावत आहेत. हे पद मंत्री भरत गोगावले यांना मिळावे, यासाठी शिवसेनेतील आमदारही शर्थीचे प्रयत्न करीत आहेत, परंतु कोणाच्या गळ्यात पालकमंत्रिपदाची माळ पडेल, हे मुख्यमंत्री, उपमुख्यमंत्री यांच्या निर्णयानंतर ठरणार आहे.
.................
काँग्रेस कार्यकर्त्यांचा राष्ट्रवादीत प्रवेश
अलिबाग तालुक्यातील बेलोशी आणि मानतर्फे झिराड येथील काँग्रेसच्या कार्यकर्त्यांनी राष्ट्रवादीमध्ये प्रवेश केला. बेलोशी विभागातील काँग्रेसचे नेते, अलिबाग पंचायत समितीचे माजी सदस्य श्रीधर भोपी, बेलोशीच्या माजी सरपंच कविता पाटील, भाविका गावंड, उज्ज्वला सांदणकर, गीतांजली पारंगे, वर्षा काटले, प्रचिती पाटील, गिरीश पाटील, रामचंद्र पारंगे, संदीप भोईर, प्रशांत काटले, नंदकुमार काटले, सतीश पाडगे, सुधीर शिर्के, सुरेश पाटील, अनंत लोहार, लक्ष्मण शेळके, सुनील भोईर, शुभम पाटील, उदय सांदणकर आदींसह मानतर्फे झिराडमधील उपसरपंच राकेश पाटील, दर्शन म्हात्रे, प्रसाद नाईक, बंडू घरत, अंकिता भगत यांनी राष्ट्रवादीमध्ये प्रवेश केला.