शाळकरी मुलीच्या अपहरणाचा प्रयत्न

शाळकरी मुलीच्या अपहरणाचा प्रयत्न
रिक्षाचालकाला अटक
भिवंडी, ता. १५ (वार्ताहर) शहरात अल्पवयीन विद्यार्थिनीच्या अपहरणाचा प्रयत्न करण्यात आला होता. यातील आरोपी रिक्षाचालकाच्या मुसक्या आवळण्यात शांतीनगर पोलिसांना यश आले आहे. असगर अली शाबीर अली शेख (३५) असे अटक केलेल्या रिक्षाचालकाचे नाव आहे, तर त्याच्या साथीदाराचा शोध पोलिस घेत आहेत, अशी माहिती शांतीनगर पोलिस ठाण्यातील वरिष्ठ पोलिस निरीक्षक विनायक गायकवाड यांनी दिली आहे.

शहरातील फातिमानगर परिसरातील १६ वर्षीय तरुणी बुधवारी ( ता. ९) दुपारी १२ वाजता शाळेत जाण्यासाठी रिक्षाने निघाली होती. या वेळी रामनगर येथील शाळेजवळ विद्यार्थिनीने रिक्षाचालकाला रिक्षा थांबविण्यास सांगितली; मात्र चालकाने रिक्षा न थांबवता पुढे घेऊन जाण्याचा प्रयत्न केला. त्या वेळी प्रसंगावधान राखत विद्यार्थिनीने स्कूल बॅगमधील कंपास पेटीत असलेल्या कर्कटकने रिक्षाचालकावर हल्ला केला. तसेच शेजारील बसलेल्या त्याच्या साथीदाराला धक्का मारत रिक्षातून उडी मारली अन् स्वतःची सुटका करून घेतली. विद्यार्थिनीने शाळेतून घरी आल्यावर तिच्यासोबत घडलेला प्रसंग आई-वडिलांना सांगितला होता. त्यानंतर शुक्रवारी (ता. ११) विद्यार्थिनीच्या तक्रारीनंतर अज्ञात रिक्षाचालक व त्याचा साथीदार अशा दोघांविरोधात गुन्हा दाखल केला होता.

पोलिसांनी घटनेचे गांभीर्य ओळखून पोलिस उपायुक्त शशीकांत बोराटे, सहाय्यक पोलिस आयुक्त सचिन सांगळे यांच्या मार्गदर्शनाखाली शांतीनगर पोलिस ठाण्याचे वरिष्ठ पोलिस निरीक्षक विनायक गायकवाड, पोलिस निरीक्षक विनोद पाटील, पोलिस निरीक्षक (गुन्हे) अतुल अड्डुरकर यांच्या नेतृत्वाखालील पोलिस पथकातील सहाय्यक पोलिस निरीक्षक योगेश गायकर, पोलिस उपनिरीक्षक काळू गवारी, पोलिस कर्मचारी संतोष पवार, संतोष मोरे, दिनेश भुरकुड, किरण जाधव, रवि पाटील, गणेश कांबळे यांच्या पथकाने विद्यार्थिनीने दिलेल्या वर्णनावरून रिक्षाचालकाचा शोध सुरू केला होता.

आरोपीला न्यायालयीन कोठडी
गुन्ह्याचा तपास करताना परिसरातील सीसीटीव्ही फुटेजच्या आधारे पोलिसांनी रविवारी (ता. १३) फातिमानगर येथे सापळा रचून रिक्षाचालक असगर अली शाबीर अली शेख याला ताब्यात घेऊन अटक केली आहे. रिक्षाचालक त्याच परिसरात राहात असल्याचे तपासात उघड झाले आहे. रिक्षाचालकास १४ जुलै रोजी न्यायालयात हजर केले असता त्याला न्यायालयीन कोठडी सुनावली आहे.