पं. सुरेश तळवलकर यांना पं. दिनकर पणशीकर स्मृती पुरस्कार जाहीर

अंबरनाथ, ता. १५ (बातमीदार) : तालयोगी पंडित सुरेश तळवलकर यांना पंडित दिनकर पणशीकर स्मृती पुरस्कार जाहीर झाला आहे. जयपूरच्या अत्रोली घराण्याचे ज्येष्ठ गायक पं. दिनकर पणशीकर यांच्या स्मृतिप्रीत्यर्थ त्यांच्या कुटुंबीयांच्या वतीने शास्त्रीय संगीत क्षेत्रातील ज्येष्ठ व्यक्तीला यंदापासून पं. दिनकर पणशीकर स्मृती पुरस्कार देण्याचा निर्णय घेण्यात आला आहे.
यंदाच्या वर्षी पं. पणशीकर यांच्या स्मृतिप्रीत्यर्थ देण्यात येणारा पुरस्कार आचार्य या नावाने तालयोगी पं. सुरेश तळवलकर यांना पुरस्कार जाहीर झाला आहे. गुरुपौर्णिमा उत्सवात ज्येष्ठ व्याख्याते डॉ. सच्चिदानंद शेवडे यांच्या हस्ते पं. तळवलकर यांना पुरस्कार प्रदान करण्यात येणार असल्याची माहिती सतारवादक पं. भूपाल पणशीकर यांनी दिली. अंबरनाथ पूर्वेकडील वडवली भागातील रोटरी सभागृहात शनिवार (ता. १९) सायंकाळी ६ वाजता पुरस्कार प्रदान समारंभ होणार आहे. कार्यक्रमाच्या पहिल्या सत्रात सुप्रसिद्ध सतारवादक पं. भूपाल पणशीकर, त्यांचे शिष्य मेघ बापट, हर्ष करंबेले आणि प्राजक्ता धुमणे सतारीवर, गीतकार गुलजार यांची निवडक गाणी सादर करणार आहेत. पं. शंतनू पणशीकर त्यांना तबलासाथ करणार आहेत. तसेच प्रिया समर्थ कथक नृत्य सादर करणार आहेत. श्रीरंग खटावकर कार्यक्रमाचे निवेदन करणार असून, सिद्धी दंडवते यांचे संहिता लेखन आहे. दुसऱ्या सत्रात सावनी तळवलकर यांचे एकल संवादिनी वादन होणार आहे. निहार बाईत त्यांना तबला साथ करणार आहेत. कार्यक्रमाचे सूत्रसंचालन निवेदक अमेय रानडे करणार आहेत.