किल्ले सागरगडाच्या संवर्धनासाठी शिवप्रेमीं आग्रही

किल्ले सागरगडाच्या संवर्धनासाठी शिवप्रेमी आग्रही
सोयीसुविधांचा अभाव असल्याने पर्यटकांची गैरसोय
पोयनाड, ता. १५ (बातमीदार) : नुकतेच युनेस्कोच्या जागतिक वारसा स्थळांच्या यादीत छत्रपती शिवाजी महाराजांच्या १२ किल्ल्यांचा समावेश झाला आहे. या ऐतिहासिक निर्णयामुळे शिवप्रेमींमध्ये आनंदाचे वातावरण निर्माण झाले आहे. मात्र पोयनाड परिसरातील छत्रपती शिवाजी महाराज आणि छत्रपती संभाजी महाराज यांच्या पदस्पर्शाने पावन झालेल्या किल्ले सागरगडाचेही संवर्धन व्हावे, त्याच्या डागडुजीकडे शासनाने लक्ष द्यावे, अशी मागणी पोयनाड परिसरातील शिवप्रेमी आणि शिवप्रेमी संस्थांनी केली आहे.
किल्ले सागरगड हा हिरवाईने नटलेला एक निसर्गरम्य गड असून, यावर छत्रपती शिवाजी महाराजांचे एक स्मारक शिवप्रेमींनी उभारले आहे. या ठिकाणी छत्रपती शिवाजी महाराजांच्या सात फुटी मूर्तीची स्थापना केली आहे. या गडावर विविध सण आणि उत्सव मोठ्या प्रमाणावर साजरे होत असतात. या गडावरूनच पुढे श्री क्षेत्र सिद्धेश्वर येथे पायवाट जाते. या सागरगडावर शिवजयंती, शिवपुण्यतिथी, शिवराज्याभिषेक दिन, किल्ले सागरगड विजय दिन, स्वच्छता अभियान, गाद संवर्धन यासारखे कार्यक्रम सागरगड संवर्धन समिती, दुर्गसेवक संस्था, दुर्गरक्षक संस्था, कुलाबा क्रीडा प्रबोधिनी, राजमुद्रा प्रतिष्ठान अलिबाग, मित्र ग्रुप चिंचोटी या संस्था करतात. या सागरगडावरील छत्रपती शिवाजी महाराजांच्या स्मारकाचे दर्शन घेण्यासह परिसरातील पर्यटनासाठी लोक मोठ्या संख्येने जात असतात. त्यामुळे परिसरातील अनेकांसाठी हे पर्यटनस्थळ श्रद्धास्‍थान बनले आहे. येथे मोठ्या प्रमाणात सोयीसुविधांचा अभाव आहे. त्‍यामुळे विजेची सुविधा, पिण्याचे पाणी, दिशादर्शक फलक ठिकठिकाणी लावावेत तसेच छत्रपती शिवाजी महाराज आणि छत्रपती संभाजी महाराजांच्या शौर्य व पराक्रमाची माहिती या सागरगडाला भेट देण्यासाठी येणाऱ्या शिवभक्त व पर्यटकांना माहिती व्हावी, यासाठी माहितीपर फलक लावावे तसेच या ऐतिहासिक किल्ल्याचे संवर्धन करावे, अशी शिवप्रेमींची मागणी आहे.