हेल्मेटधारी चोरट्याच्या पोलिसांनी आवळल्या मुसक्या

अंबरनाथ, ता. १५ (वार्ताहर) : अंबरनाथमध्ये दिवसाढवळ्या घरफोडी करून सात लाख ८७ हजारांचे सोन्याचे दागिने लंपास करणाऱ्या आणि हातोडीने हल्ला करणाऱ्या चोरट्याच्या पोलिसांनी अवघ्या १२ तासांत मुसक्या आवळल्या आहेत. या चोरट्याने चोरीच नाही, तर एका मूकबधिर आणि त्याला वाचवायला आलेल्या महिलेवरही हातोडीने हल्ला करून घटनास्थळावरून पळ काढला होता. या चोरट्याच्या उल्हासनगर गुन्हे शाखा चारने पनवेलमधून मुसक्या आवळल्या आहेत.
अंबरनाथमध्ये दिवसाढवळ्या झालेल्या चोरीच्या या घटनेने परिसरात खळबळ उडाली होती. पूर्वेच्या शिवगंगानगरमधील शिवश्रद्धा अपार्टमेंटमध्ये शनिवारी संध्याकाळी साडेसहाच्या सुमारास ही घटना घडली. रुची गायकवाड (वय ३२) या गृहिणी आहेत. शनिवारी सायंकाळी त्यांच्या घराचा दरवाजा उघडा असल्याने चोरट्याने हेल्मेट व काळ्या रंगाचा रेनकोट आणि हातात बॅग घेऊन घरात प्रवेश करत चोरी केली होती. यावेळी चोरट्याला प्रतिकार करताना रुची आणि त्यांच्या दीर गणेशवर त्याने हातोडीने हल्ला करून जखमी केले होते. याप्रकरणी शिवाजीनगर पोलिस ठाण्यात गुन्हा दाखल झाला होता. पोलिसांनी सीसीटीव्हीच्या आधारे या आरोपीचा शोध घेत त्याला अवघ्या १२ तासांत पनवेलमधून उल्हासनगर गुन्हे शाखा चारने अटक केली. रविराज अभिमान कसबे (वय ३७) असे आरोपीचे नाव असून, तो आकुर्ली येथील राहणारा असल्याची माहिती उपआयुक्त सचिन गोरे यांनी दिली.