मुरबाड ते कल्याणदरम्यान जादा बसेस सोडण्याची मागणी

मुरबाड (बातमीदार) : मुरबाड ते कल्याणदरम्यान दररोज प्रवास करणाऱ्या शेकडो प्रवाशांच्या सोयीसाठी विविध मागण्यांचे निवेदन मुरबाड एसटी आगारप्रमुखांना देण्यात आले. एसटीच्या मुरबाड आगारात कल्याणकडे जाण्यासाठी सकाळी सात ते दहादरम्यान प्रवाशांची मोठी गर्दी असते. सायंकाळी पाच ते नऊ या दरम्यान कल्याण आगारात प्रवाशांची गर्दी असते. नेमक्या याच वेळेत पुरेशा बस उपलब्ध नसल्याने महिला, वयोवृद्ध प्रवासी, रोज ये-जा करणारे प्रवाशांची मोठी गैरसोय होते. या साठी मुरबाड ते कल्याण दरम्यान जादा बस सोडण्यात यावे, अशी मागणी प्रवासी करत आहे. प्रवाशांचे सोयीसाठी इलेक्ट्रिक बस सेवा त्वरित सुरू करावी. मुरबाड-कल्याण प्रवासासाठी फेऱ्यांमध्ये वाढ करावी, अशी मागणी संघटनेतर्फे करण्यात आली. प्रेम ऑटो सर्कल कल्याण येथून मुरबाडसाठी प्रायोगिक तत्त्वावर बस सोडण्यात याव्यात, अशी मागणी संघटनेतर्फे केल्याचे सामाजिक कार्यकर्ते भरत दळवी यांनी सांगितले.