धारावीतील रस्त्यांवर मनस्ताप

धारावी, ता. १५ (बातमीदार) : धारावीतील अंतर्गत रस्त्यांवर खड्ड्यांचे साम्राज्य पसरलेले आहे. पावसाला सुरुवात होताच धारावीतील अनेक रस्त्यांवर खड्डे पडण्यास सुरुवात झाली होती. त्याची सविस्तर बातमी ‘सकाळ’मध्ये प्रसिद्ध होताच पालिकेने खड्डे बुजवण्यास सुरुवात केली होती, मात्र जुलैमध्ये मुसळधार पावसामुळे धारावीतील अंतर्गत रस्त्यांवर पुन्हा खड्डे पडले आहेत.
रस्त्यावरील खड्डे ही धारावीकरांसाठी दरवर्षीची डोकेदुखी बनून बसली आहे. पावसाळ्यापूर्वी पालिकेने रस्त्याचे नूतनीकरण करणे गरजेचे असताना त्याकडे दरवर्षी पालिकेचे अधिकारी दुर्लक्ष करतात. यामुळे धारावीतील रहिवाशांना अपघातांना तोंड द्यावे लागते. अनेक खड्ड्यांमध्ये पावसाचे पाणी साचून राहते यामुळे रात्रीच्या वेळेस दुचाकीस्वारांना त्याचा अंदाज येत नसल्याने अनेकदा दुचाकीस्वार खड्ड्यांमध्ये घसरून पडण्याच्या घटना घडत आहेत. यामुळे एखाद्या वाहनचालकाचे प्राण जाण्याचा धोका निर्माण झाला आहे. पालिकेने रस्त्याची डागडुजी न करता रस्त्यांची पूर्ण दुरुस्ती करावी, अशी मागणी स्थानिक श्री अष्टविनायक सांस्कृतिक संस्थेचे अध्यक्ष शंकर खिल्लारे यांनी केली आहे. तात्पुरती मलमपट्टी करून पालिकेने वेळ मारून नेली होती. त्याच वेळेस स्थानिक रहिवाशांनी या तात्पुरत्या मलमपट्टीवर आक्षेप घेतला, मात्र रहिवाशांच्या तक्रारीकडे प्रशासनाने दुर्लक्ष केले होते.