एटीव्हीएम मशीन कुलूप बंद घरात

एटीव्हीएम मशीन कुलूप बंद घरात
ठाकुर्ली रेल्वेस्थानकातील प्रकार
सकाळ वृत्तसेवा
डोंबिवली, ता. १५ : ठाकुर्ली रेल्वेस्थानकात तिकीट खिडकी बंद असल्यास एटीव्हीएम मशीनचा वापर करा, अशी सूचना देण्यात आली आहे. स्थानकात दररोज सकाळी साडेसहा वाजेपर्यंत तिकीट खिडकी बंद असते. यामुळे नागरिकांना एटीव्हीएम मशीनचा वापर करण्याशिवाय पर्याय नसतो; मात्र हे मशीन कुलूप बंद तिकीट घरात ठेवतात. त्यामुळे ते सहज वापरणे प्रवाशांना अनेकदा शक्य होत नाही. ज्या प्रवाशांना या मशीनचा वापर करता येत नाही, ऑनलाइन पेमेंटच्या सुविधा त्यांच्याकडे नाहीत, अशा प्रवाशांनी मग सकाळच्या वेळी विनातिकीट प्रवास करायचा का, असा सवाल यानिमित्ताने जागरूक नागरिक उपस्थित करत आहेत.

मध्यरेल्वे मार्गावरील डोंबिवली व कल्याण या महत्त्वाच्या दोन रेल्वे स्थानकांच्या मध्ये ठाकुर्ली स्थानक आहे. ठाकुर्ली परिसराचा कायापालट झाला असून मोठमोठी गृहसंकुल येथे उभी राहीली आहेत. परिणामी ठाकुर्ली रेल्वे स्थानकातून प्रवास करणाऱ्या प्रवाशांचीदेखील संख्या दिवसेंदिवस वाढत आहे. या स्थानकातून प्रवास करताना प्रवाशांना कायमच कोणत्या ना कोणत्या अडचणींचा सामना करावा लागतो.

स्थानकातील सरकते जिने अनेकदा बंद असतात. त्यामुळे प्रवाशांना जिने चढूनच स्थानकात जावे लागते. त्यातच सध्याच्या घडीला रेल्वे प्रशासनाने लावलेली एक सूचना लक्ष वेधून घेत आहे. तिकीट खिडकी बंद असल्यास एटीव्हीएम मशीनचा वापर तिकीट काढण्यासाठी करावा, अशी सूचना देण्यात आली आहे. तर दुसरीकडे या एटीव्हीएम मशीन तिकिट घरात ठेवण्यात आल्या आहेत. या तिकीट घराला कुलूप लावून तेदेखील बंद ठेवले आहेत. सकाळी साडेसहा वाजेपर्यंत तिकिट घर बंदच असते. यामुळे प्रवाशांनी नक्की तिकीट कोठे व कसे काढावे असा सवाल रेल्वे प्रवासी करत आहेत.

दंडाचा नाहक भूर्दंड
तिकीट घराच्या लोखंडी गेटमधून हात घालून तिकीट काढणे सहज शक्य होत नाही. इच्छित ठिकाण अनेकदा सूचित करता येत नाहीत. शिवाय ज्यांना हे मशीन वापरता येत नाही, ऑनलाईन पेमेंटची सुविधा ज्यांच्याकडे उपलब्ध नाही, अशा प्रवाशांची यावेळी मोठी गैरसोय होते. त्यामुळे त्यांना अनेकदा विनातिकीट प्रवास करावा लागतो. त्यात टिसी ने अडविल्यास तिकीट जवळ नसल्याने दंड भरावा लागतो. रेल्वे प्रशासनाची चूक असताना आम्हाला नाहक भूर्दंड सहन करावा लागत असल्याचे प्रवाशांचे म्हणने आहे.

प्रवाशांचा प्रशासनाला जाब
जागरुक नागरिक मंदार अभ्यंकर यांनी रेल्वे प्रशासनाला याविषयी ट्विट केले आहे. त्यांनी ट्विटमध्ये म्हटले आहे की, स्थानकावर रोज सकाळी साडेसहा वाजेपर्यंत तिकीट खिडकी बंद असते. तर एटीव्हीएम मशीन जेलमध्ये बंद असते. मशीनचा वापर करता येत नाही त्याचे काय ? मोठ्या अक्षरात हिंदी बोर्ड लावला की जबाबदारी संपते. त्याखाली लहान अक्षरात मराठीत सूचना असते. असे म्हणत त्यांनी रेल्वे प्रशासनाला ट्विट करत जाब विचारला आहे.