पर्यटन विकास आराखड्यासाठी विशेष बैठकीची मागणी

विरार, ता. १५ (बातमीदार) : वसई-विरार उपप्रादेशिक विभागातील पर्यटनस्थळांचा सर्वांगीण विकास साधण्यासाठी आमदार स्नेहा दुबे-पंडित यांनी पर्यटनमंत्री शंभूराज देसाई यांच्याकडे लेखी पत्राद्वारे विशेष बैठक घेण्याची मागणी केली आहे.

वसई-विरारच्या परिसरात अनेक विविध प्रेक्षणीय स्थळे असून, त्यांचा सुयोग्य विकास अद्याप झालेला नाही. या ठिकाणी पर्यटकांची संख्या वाढत असून, सुविधा अपुऱ्या असल्याने या ठिकाणांचा पुरेपूर वापर होत नाही. या ठिकाणांसाठी आराखडा तयार करून पर्यटनदृष्ट्या महत्त्वपूर्ण पावले उचलण्यासाठी पर्यटन विभागासोबत महसूल, नगरविकास, वन, पुरातत्त्व विभाग व वसई-विरार महापालिकेच्या अधिकाऱ्यांची संयुक्त बैठक घेण्याची मागणी स्नेहा दुबे-पंडित यांनी केली आहे. या बैठकीतून वसई-विरार परिसराला जागतिक पर्यटन नकाशावर स्थान मिळवून देण्यासाठी दिशा ठरवता येईल, असेही त्या म्हणाल्या. विशेषतः स्थानिक तरुणांसाठी रोजगाराच्या संधी, स्वच्छता, रस्ते, पाणी, शौचालय, सुरक्षाव्यवस्था यावर भर देण्यात येईल, असे त्यांनी शेवटी सांगितले.