डोंबिवलीतील रहिवाशांचे आझाद मैदानावर आंदोलन

बेकायदा इमारतीतील रहिवाशांचे आझाद मैदानावर आंदोलन
सकाळ वृत्तसेवा
डोंबिवली, ता. १५ : ६५ बेकायदा इमारतींतील रहिवाशांना राज्य सरकारने न्याय द्यावा, या मागणीसाठी या इमारतीमधील नागरिकांनी मंगळवारी (ता. १५) आझाद मैदानावर धरणे आंदोलन सुरू केले आहे. यात महिला, पुरुष, लहान मुले, ज्येष्ठ नागरिक आंदोलनात सहभागी झाले आहेत.

सध्या विधिमंडळ अधिवेशन सुरू आहे. या अधिवेशनाच्या माध्यमातून मुख्यमंत्री देवेंद्र फडणवीस यांच्यासह सरकारचे या महत्त्वपूर्ण विषयाकडे लक्ष वेधण्यासाठी डोंबिवलीतील ६५ बेकायदा इमारतींमधील रहिवाशांनी हे आंदोलन सुरू केले आहे. या बेकायदा इमारती तोडण्याचे आदेश न्यायालयाने दिल्यानंतर मुख्यमंत्री देवेंद्र फडणवीस यांनी काही महिन्यांपूर्वी या इमारतींमधील रहिवाशांच्या पाठीशी सरकार आहे. त्यांना बेघर होऊ दिले जाणार नाही, असे आश्वासन दिले होते. दरम्यानच्या काळात काहीही हालचाल झाली नाही. उलट पालिकेने भरपावसाळ्यात या इमारतीमधील रहिवाशांना इमारती रिकाम्या करण्याच्या नोटिसा पाठविल्याने रहिवासी चिंताग्रस्त आहेत.

रहिवाशांच्या निवाऱ्याबाबत शासनाने योग्य निर्णय घ्यावा, यासाठी या इमारतीमधील रहिवासी मंगळवारी (ता. १५) सकाळी ९ वाजताच मुंबईत आझाद मैदान येथे दाखल झाले. पाऊस सुरू असताना त्यांनी धरणे आंदोलन सुरू केले. अनुचित प्रकार टाळण्यासाठी याठिकाणी पोलिस बंदोस्त तैनात आहे. ६५ इमारतींमधील रहिवाशांवरील अन्याय दूर करा, देवा भाऊ न्याय द्या, देवा भाऊ लाडक्या बहिणींचे अश्रू पुसा, गोरगरिबांना न्याय द्या, अन्याय करणाऱ्या भूमाफियांना शिक्षा द्या, घर द्या, बेघर करू नका, असे फलक घेऊन रहिवासी या आंदोलनात सहभागी झाले आहेत.