कोपरीत तलवारीने तरुणावर वार

कोपरीत तलवारीने तरुणावर वार
तिघांविरोधात गुन्हा दाखल
सकाळ वृत्तसेवा
ठाणे, ता. १५ : कोणता तरी जुना वाद तसेच इतर काही कारणाने दादा पाटील वाडी येथील भावेश वाघुले (वय २८) या तरुणावर एका त्रिकूटाने तलवार आणि चाकूने हल्ला केल्याची घटना रविवारी (ता. १३) घडली. त्यानंतर कोपरी पूर्व येथील अष्टविनायक चौकात तिघे हल्लेखोर तलवार हवेत फिरवून दहशत निर्माण करून निघून गेले. याप्रकरणी अन्वेय मनीष जैसवाल, त्याचा भाऊ विकास आणि जयेश पिंगूरकर या तिघांविरोधात गुन्हा दाखल असल्याची माहिती कोपरी पोलिसांनी दिली. दरम्यान, भावेशला खासगी रुग्णालयात दाखल करण्यात आले आहे.
भावेश याचे वडील सुनील वाघुले यांचे कोपरीत जुने घर असून, तेथे आई-वडील राहत आहेत. तेथे १३ जुलैला सुनील पत्नीसह त्यांना भेटण्यासाठी गेला असता भावेशही मित्रांना भेटण्यासाठी आला होता. त्याचदरम्यान कोणत्या तरी जुना वादावरून तसेच इतर काही कारणाने कोपरी परिसरात राहणाऱ्या मनीष जैसवाल ऊर्फ मुर्गी, त्याचा भाऊ विकास आणि जयेश पिंगूरकर यांनी जीवे मारण्याच्या उ‌द्देशाने तलवारीने व चाकूने भावेश याच्या दोन्ही हातांवर तसेच डोक्यावर डाव्या बाजूस वार करून गंभीर जखमी केले, अशी तक्रार सुनील यांनी केली. याप्रकरणी गुन्हा दाखल करण्यात आला असून, पुढील तपास सुरू आहे.