मोकाट गुरांवर नियंत्रणासाठी ग्रामपंचायतींची कडक मोहीम

कासा, ता. १५ (बातमीदार) : डहाणू तालुक्यातील विविध रस्त्यांवर मोकाट फिरणाऱ्या गुरांमुळे अपघातांच्या घटना सातत्याने वाढत असल्याच्या पार्श्वभूमीवर ग्रामपंचायतींनी आता कडक मोहीम हाती घेतली आहे.

नागरिकांच्या जीवितास व वाहनांच्या सुरक्षेला धोका निर्माण झाल्यामुळे गटविकास अधिकारी पल्लवी सस्ते यांनी तातडीचे आदेश जारी केले आहेत. यानुसार मोकाट गुरे रस्त्यावर आढळल्यास ग्रामपंचायतींनी त्वरित फ्लेक्स फलक लावून, तसेच दवंडीच्या माध्यमातून गुरांच्या मालकांना सूचना द्याव्यात. सहाय्यक जिल्हाधिकारी विशाल खत्री यांच्या अध्यक्षतेखाली २ जुलै रोजी झालेल्या बैठकीत यासंदर्भातील ठराव पारित करण्यात आला होता. गुरांच्या मालकांनी आपली गुरे बंदिस्त न ठेवल्यास ती गुरे गोशाळेत हलवण्यात येणार असल्याचे स्पष्ट करण्यात आले आहे. यासाठी तालुक्यात अनेक गावांमध्ये सूचना फलक, फ्लेक्स लावण्यात आले असून, गावात ठिकठिकाणी दवंडी पिटवण्यात येत आहे. तसेच ग्रामपंचायतींना या कारवाईचा सविस्तर अहवाल गटविकास अधिकारी कार्यालयात पाठवण्याचे आदेश देण्यात आले आहेत. भविष्यात रस्त्यावर मोकाट गुरे आढळल्यास त्यांना थेट गोशाळेत नेण्याची कारवाई करण्याचा इशारा देण्यात आला आहे. ग्रामपंचायत स्तरावर मालकांनी गुरांचा बंदोबस्त करावा अन्यथा ती गुरे गोशाळेत पाठवावी, अशा सूचना दिल्या आहेत.