कल्याण पूर्वेत विजेचा खेळखंडोबा

कल्याण पूर्वेत विजेचा खेळखंडोबा
कल्याण, ता. १५ (बातमीदार) : शहरात होणाऱ्या सततच्या भारनियमनामुळे नागरिक, व्यापारी, शाळांना मागील काही दिवसांपासून प्रचंड त्रासाचा सामना करावा लागत आहे. या समस्येबाबत शिवसेना ठाकरे गटाच्या वतीने महावितरणच्या अधिकाऱ्यांना लेखी निवेदन देत जाब विचारण्यात आला आहे. तसेच समस्या न सुटल्यास आंदोलन करण्याचाही इशारा या वेळी ठाकरेंच्या शिवसेनेने दिला आहे.

महावितरणचे कल्याण पूर्व कार्यकारी अभियंता जगदीश बोडखे व सहाय्यक अभियंता राठोड यांना दिलेल्या निवेदनात वाढत्या लोकसंख्येच्या प्रमाणात विद्युतसाठा व पुरवठ्याचे भविष्यातील नियोजन करणे, अपुऱ्या कर्मचाऱ्यांची तातडीने भरती करणे, तसेच वीजपुरवठा खंडित होण्याच्या समस्येवर कायमस्वरूपी उपाययोजना करणे याबाबत त्वरित पावले उचलावीत, अशी मागणी केली आहे. या वेळी शिष्टमंडळासोबत संतप्त नागरिक व व्यापाऱ्यांनी सतत होणाऱ्या विजेच्या लपंडावामुळे निर्माण झालेल्या अडचणी मांडल्या. कल्याण पूर्वेतील वीजग्राहकांकडून सर्वाधिक वसुली होत असतानाही वीजपुरवठा सुरळीत न होणे, हे महावितरणचे अपयश आहे, असे मत शिष्टमंडळाने व्यक्त केले.

आंदोलनाचा इशारा
कार्यकारी अभियंता बोडखे म्हणाले की, पडघा येथील मुख्य वीजवाहिनी केंद्रातील एक फिडर बंद असल्याने वीजपुरवठ्यात अडचणी येत आहे. त्यामुळे नाइलाजास्तव काही वेळ अघोषित भारनियमन करावे लागत आहे; मात्र या समस्येवर लवकरच सुधारणा होईल तसेच भविष्यातील वीजपुरवठा सुरळीत करण्यासाठी प्रयत्न सुरू असल्याचे सांगितले, तर याबाबत तातडीने निर्णय न झाल्यास तीव्र आंदोलन करण्यात येईल, असा जाईल असा इशारा शिवसेनेच्या शिष्टमंडळाने दिल्याचे कल्याण पूर्व विधानसभा प्रमुख नारायण पाटील म्हणाले.