शिरवणे धबधब्याला नवीन ओळख

शिरवणे धबधब्याला नवीन ओळख
नेरूळ, ता. १५ (बातमीदार) ः शिरवणे धबधब्याला नवीन ओळख देण्यात आली आहे. येथील ग्रामस्‍थांकडून शिरवणे धबधबा असे फलक बसविण्यात आले आहे. नवी मुंबईतील एमआयडीसी परिसरातील अनेक धबधबे प्रसिद्ध आहेत. हे धबधबे पर्यटकांना खुणावत असतात. वीकेंडला पर्यटक या ठिकाणी गर्दी करत असतात. शिरवणे एमआयडीसी येथील महात्मा गांधी नगर येथेदेखील नैसर्गिक धबधबा आहे. बाहेरून येणाऱ्या पर्यटकांकडून या धबधब्याला नेरूळ धबधबा असे संबोधले जाते. हे लक्षात घेत या धबधब्याला शिरवणे धबधबा म्हणून ओळखले जावे, यासाठी माजी नगरसेविका रोहिणी भोईर यांनी याबाबत पुढाकार घेेेतला आहे. त्‍यांना शिरवणे ग्रामस्थ मंडळाचे अध्यक्ष प्रभाकर ठाकूर यांनीदेखील पाठिंबा दिला आहे. पर्यटकांना दिसेल अशा शिरवणे धबधबा नावाचा फलक बसवला जाऊन त्याचे अनावरण करण्यात आले आहे. शिरवणे धबधबा या नावाने हा धबधबा प्रसिद्ध होत आहे. वेगवेगळ्या ठिकाणांहून पर्यटक या ठिकाणी रिल्स बनवताना दिसून येतात. शिरवणे गावचे नाव इतर कारणांसाठी कुप्रसिद्ध आहे, मात्र आमच्या गावातील धबधब्याला बाहेरचे हौशी पर्यटक येऊन आनंद घेतात. त्यामुळे आम्‍ही ग्रामस्थांनी या ठिकाणी शिरवणे धबधबा असा फलक लावून त्याचे अनावरण केले असल्याचे माजी नगरसेविका रोहिणी भोईर यांनी सांगितले.