पालघरमध्ये २० रोजगार मेळाव्यांचे आयोजन

पालघर, ता. १५ (बातमीदार) : राज्यामध्ये चालू आर्थिक वर्षामध्ये एक हजार रोजगार मेळाव्याचे आयोजन करण्याचे उद्दिष्ट कौशल्य, रोजगार, उद्योजकता आणि नावीन्यता विभाग मंत्री मंगलप्रभात लोढा यांच्या संकल्पनेतून निश्चित करण्यात आले आहे. त्या अनुषंगाने पालघर जिल्ह्यामध्ये सुमारे २० रोजगार मेळाव्यांचे आयोजन करण्याचा पालघर जिल्हा कौशल्य विकास, रोजगार व उद्योजकता मार्गदर्शन केंद्राचा मानस आहे.

जिल्ह्यासह महाराष्ट्रातील तरुणांना रोजगाराची संधी निर्माण करण्यासाठी रोजगार मेळावे आयोजित करण्यात येणार आहेत. जिल्हा कौशल्य विकास, रोजगार व उद्योजकता मार्गदर्शन केंद्र व एकलव्य आदिवासी शासकीय औद्योगिक संस्था यांच्या संयुक्त विद्यमाने सोमवारी (ता. १४) पालघर येथील एकलव्य आदिवासी शासकीय औद्योगिक संस्थेमधून सुरुवात करण्यात आली आहे. या पार्श्वभूमीवर पालघर जिल्ह्यातील १७ खासगी कंपन्या, आस्थापनांनी त्यांच्याकडील ९५९ रिक्त पदांची माहिती या कार्यालयाला कळविली होती. त्याकरिता एकूण ५८३ बेरोजगारांनी या रोजगार मेळाव्यामध्ये सहभाग नोंदविला आहे. त्यापैकी ३७० उमेदवारांनी मुलाखती दिल्या असून, १९५ उमेदवारांची प्राथमिक निवड झाल्याची माहिती जिल्हा कौशल्य विकास रोजगार व उद्योजगता मार्गदर्शन केंद्राच्या सहाय्यक आयुक्त रेणुका तमलवार यांनी दिली.