खारघर मधील पुलाखालील भिक्षेकऱ्यांचे बस्तान

खारघरमधील पुलाखाली भिक्षेकऱ्यांचे बस्तान
खारघर, ता. १५ (बातमीदार) : एकविसाव्या शतकातील आधुनिक शहर म्हणून ओळखल्या जाणाऱ्या खारघरमधील पुलाखालील दुभाजक आणि पदपथावर फुगे, खेळणी विक्रेते आणि भिक्षेकऱ्यांनी बस्तान मांडले आहे. रात्री झोपण्यासाठी, स्वयंपाक करण्यासाठीही पदपथांचा वापर होत असल्याचे निदर्शनास येत आहे. रस्त्यावरून भरधाव वाहनांमुळे अपघात झाल्यास त्यास जबाबदार कोण, असा प्रश्न नागरिकांना पडला आहे.
शिक्षणाचे माहेरघर म्हणून ओळखल्या जाणाऱ्या खारघर शहरात नवी मुंबई मेट्रो, गोल्फ कोर्स, सेंट्रल पार्क तसेच सिडकोचे नियोजन असलेल्या खारघर कॉर्पोरेट पार्कमुळे खारघरचे नाव जगभर झाले आहे. याशिवाय इस्कॉन मंदिराची भर पडली आहे. दरम्यान, सिडकोने शहरात शिल्प चौक, उत्सव चौक आणि चौपदरी रस्ते उभारल्यामुळे या चौक आणि रस्त्यांवर नेहमी सिनेमा, सीरियल आणि जाहिरातींचे चित्रीकरण सुरू असते. मात्र या सुनियोजित शहरातील पुलाखालील तसेच शहरातील प्रमुख रस्त्यांवरील दुभाजकांचा ताबा घेत खेळणी विक्रेते आणि भिक्षेकऱ्यांनी संसार मांडल्यामुळे पदपथ नक्की कोणासाठी, असा सवाल उपस्थित झाला आहे. खारघरमधील नवी मुंबई मेट्रो मार्गावरील पेठपाडा मेट्रो पुलाखाली तसेच सेक्टर १२ शिवमंदिरकडून घरकुलकडे जाताना चेरोबा मंदिराशेजारील पदपथ आणि रस्त्याच्या मध्यभागी असलेल्या दुभाजकावर झोपडी उभारून बस्तान मांडले आहे. सायंकाळी चारनंतर पती-पत्नी शहरातील पदपथावर फुगे व खेळणी विक्री करीत असल्याचे तर लहान मुले रस्त्यावर खेळत असल्याचे चित्र आहे. विशेषतः या रस्त्यावर नेहमी वाहनांची वर्दळ असते. रस्ता ओलांडताना मुले अथवा महिला वाहना खाली येऊन अपघात झाल्यास त्यास कोण जबाबदार, असा प्रश्न नागरिकांना पडला आहे. विशेष म्हणजे सर्वात वर्दळीच्या सायन-पनवेल महामार्गावरील हिरानंदानी पुलाखाली काहींनी संसार मांडला आहे. दिवसभरात या रस्त्यावरून पालिका, सिडको आणि वाहतूक पोलिस ये-जा करीत असतात. मात्र ते दुभाजकावरील झोडपड्यांकडे दुर्लक्ष करीत असल्याचे दिसून येते. याविषयी सिडको आणि वाहतूक पोलिसांकडे विचारणा केली असता, पदपथ आणि पुलाखाली वास्तव्य करणाऱ्या बेघर व्यक्तींवर पालिकेने कारवाई करणे आवश्यक असल्याचे सांगितले.

कोट
खारघरमधील पुलाखाली आणि पदपथावर वास्तव्य करणारी कुटुंबे खेळणी आणि फुगे विक्री करणारी आहेत. या व्यक्तींवर कारवाईसाठी पोलिसांकडून बंदोबस्त मागितला आहे. बंदोबस्त मिळाल्यावर कारवाई करून दुभाजक आणि रस्ते मोकळे केले जातील.
- जितेंद्र मढवी, प्रभाग अधिकारी, खारघर