बस अपघात प्रकरणी चालकावर गुन्हा दाखल

बस अपघातप्रकरणी चालकावर गुन्हा दाखल
कामाच्या अति ताणामुळे अपघाताची शक्यता
तारापूर, ता. १५ (बातमीदार) : बोईसर आगारात झालेल्या एसटी बसचा अपघातप्रकरणी चालकावर गुन्हा दाखल करण्यात आला आहे. कामाच्या अति ताणामुळे चालकाचे बसवरील नियंत्रण सुटून अपघात घडल्याची शक्यता प्रथमदर्शनी व्यक्त केली आहे.
बोईसर आगारात सोमवारी (ता. १५) दुपारच्या सुमारास चालकाचे बसवरील नियंत्रण सुटल्याने बस हिरकणी कक्षाला धडकून अपघात घडला होता. यात चालक आदिनाथ कुटे हा जखमी झाल्याने त्याच्यावर खासगी रुग्णालयात उपचार सुरू आहेत. निष्काळजीपणे बस चालवून प्रवाशांच्या जीवितास धोका निर्माण केल्याप्रकरणी चालकावर बोईसर पोलिस ठाण्यात गुन्हा नोंद करण्यात आला आहे.
एसटीच्या पालघर विभागाअंतर्गत येणाऱ्या बोईसर आगारात एकूण ६२ बस कार्यरत असून, दिवसभरात स्थानिक आणि लांब पल्ल्याच्या मिळून ५१० फेऱ्या चालविल्या जातात. बस आगारात कायमस्वरूपी ५३ चालक आणि ६१ वाहक सेवा बजावत असून, चालक आणि वाहक म्हणून दोन्ही प्रकारच्या सेवा देणारे १२१ कर्मचारी कार्यरत आहेत. त्याचप्रमाणे बसची देखभाल आणि दुरुस्ती व कार्यालयीन कामांसाठी ५५ कर्मचारी आहेत. बोईसर आगारात एकूण मंजूर पदसंख्येच्या तुलनेत जवळपास ३५ ते ४० टक्के कमी मनुष्यबळ असून, अपुऱ्या मनुष्यबळामुळे इतर कर्मचाऱ्यांवर कामाचा ताण वाढून त्यांना जास्तीचे काम करावे लागत असल्याची खंत बस कर्मचाऱ्यांनी व्यक्त केली.

एसटीचा अनागोंदी कारभार समोर
बोईसर आगारात अपुऱ्या मनुष्यबळासोबतच बस आगारात आवश्यक सोयीसुविधांची वानवा आहे. विश्रांती कक्ष, स्वच्छतागृहाच्या दुरवस्थेमुळे कर्मचाऱ्यांची, विशेषत: महिला कर्मचाऱ्यांची मोठी कुचंबणा होते. सर्व कर्मचाऱ्यांची दर महिन्याला वैद्यकीय तपासणी करण्यात येते; मात्र काही वेळा कौटुंबिक वाद, कर्जबाजारीपणा, आजारपण यामुळे मानसिक तणाव निर्माण होऊन त्याचा विपरीत परिणाम एसटी बसचे चालक आणि वाहक यांच्या आरोग्यावर होऊन अपघातांची शक्यता वाढीस लागते, अशी माहिती येथील आगारप्रमुखांकडून समोर आली आहे.