तळोजा भुयारी मार्ग पुन्हा बंद

खारघर, ता. १५ (बातमीदार) : पावसामुळे मंगळवारी तळोजा भुयारी मार्गात पाणी भरल्याने रहिवाशांना पेंधर उड्डाणपूलमार्गे प्रवास करावा लागला. त्‍यामुळे स्‍थानिकांनी संताप व्यक्‍त केला.
दिवा-पनवेल रेल्वे मार्गावरील तळोजा वसाहतीच्या प्रवेशद्वार असलेल्या रेल्वे फाटकवर होणारी वाहतूक कोंडी सोडविण्यासाठी सिडको आणि रेल्वे प्रशासनाच्या माध्यमातून भुयारी मार्ग बांधण्यात आला. यासाठी जवळपास ५० कोटींहून अधिक रुपये खर्च करण्यात आले, मात्र सिडको आणि रेल्वेने निकृष्ट दर्जाचे काम केल्यामुळे भुयारी मार्गात पावसाळ्यात पाणी तुंबते. त्‍यामुळे वाहतूक बंद होत असल्‍याने विद्यार्थी, नोकरदारांसह परिसरातील नागरिकांना तीन किलोमीटर अंतर पार करून पेंधर रेल्वे फाटकमार्गे ये जा करावी लागते.
विशेष म्हणजे रेल्वेने भुयारी मार्गातील पाण्याचा निचरा करण्यासाठी २५ आणि ५० हर्स पॉवरचे पंप तसेच वीजपुरवठा खंडित झाल्यास २०० केव्हीच्या जनरेटरची सोय केली आहे, मात्र स्थानिक रेल्वे प्रशासनाकडून योग्य देखभाल केली जात नसल्यामुळे मे महिन्यात झालेल्‍या पावसात पाच फूट पाणी भरल्यामुळे जवळपास तीन दिवस भुयारी मार्ग बंद होता. या वेळी पोलिसांनी तळोजा फेज दोनमधील पेंधर रेल्वे फाटकमार्गे वाहतूक सुरू करून कोंडी सोडविली होती. दरम्यान, जूनमध्येही अशीच अवस्था झाल्यामुळे स्थानिक सर्वपक्षीय कार्यकर्त्यांनी रेल्वे विभागाचे उपअभियंता अजय सिंग यांना धारेवर धरले होते. मंगळवारी पुन्हा भुयारी मार्गात पाणी भरल्याने नागरिकांमधून संताप व्यक्त होत आहे.

सकाळपासून सुरू असलेल्या मुसळधार पावसामुळे पाणी भरल्याची घटना घडली आहे. मोटार पंप लावून पाण्याचा निचरा करण्यासाठी प्रयत्न सुरू असल्याचे आहे.
- अजय सिंग, उपअभियंता, पनवेल रेल्वे विभाग

तळोजा वसाहतीत ये-जा करण्यासाठी एकमेव भुयारी मार्ग आहे. पाणी भरल्‍याने शालेय विद्यार्थी, नोकरदार, स्‍थानिकांना खूप त्रास होतो. सिडको आणि रेल्वे प्रशासनाने योग्य ती उपाययोजना करावी.
- विकास वैरागर, रहिवासी, तळोजा फेज वन