बेस्ट बसला फोर्ट परिसरात आग

बेस्ट बसला फोर्ट परिसरात आग
सकाळ वृत्तसेवा
मुंबई, ता. १५ : बेस्ट उपक्रमाच्या बसला मंगळवारी (ता. १५) सकाळच्या सुमारास आग लागल्याची घटना घडली. ही घटना फोर्ट परिसरातील सिद्धार्थ महाविद्यालयाच्या समोर घडली. या आगीमध्ये बसचे नुकसान झाले असून, जीवितहानी झाली नसल्याची माहिती बेस्टच्या सूत्रांनी दिली. बस मार्ग क्रमांक १३८ ही बस फोर्ट परिसरातून भाटिया बाग येथून बॅकबे आगारात जात होती. ही बस सकाळी सव्वानऊच्या सुमारास सिद्धार्थ महाविद्यालयाच्या सिग्नलजवळ पोहोचली आणि बसच्या पुढील डाव्या बाजूला असलेल्या चाकाच्या शेजारील उच्च विद्युत दाबाच्या बॅटरीला आग लागली. या आगीने सर्वत्र धूर पसरला तशी प्रवाशांमध्ये प्रचंड घबराट निर्माण झाली. तातडीने सर्व प्रवासी बसच्या बाहेर पडले. या आगीची माहिती वाहकाने अग्निशमन दलाला आणि पोलिसांना दिली. त्यांनी तातडीने घटनास्थळी धाव घेऊन आग आटोक्यात आणली. कुलाबा आगारातील ही बस असून, भाडेतत्त्वावरील कंत्राटी बस होती. या आगीच्या घटनेची चौकशी सुरू असल्याची माहिती बेस्टच्या सूत्रांनी दिली.