अभुदय नगरच्या पुनर्विकासाला ‘तारिख पे तारिख’

अभुदयनगरच्या पुनर्विकासाला ‘तारीख पे तारीख’
अल्प प्रतिसादामुळे म्हाडाने काढलेल्या निविदेला सातव्यांदा मुदतवाढ

सकाळ वृत्तसेवा
मुंबई, ता. १५ : म्हाडा बांधकाम आणि विकास संस्थेच्या माध्यमातून अभ्युदयनगरचा पुनर्विकास केला जाणार आहे. त्यानुसार विकसकाच्या नियुक्तीसाठी म्हाडाने निविदा मागवल्या असून, त्याला अल्प प्रतिसाद मिळत आहे. त्यामुळे निविदा भरण्यासाठी म्हाडाकडून ‘तारीख पे तारीख’प्रमाणे मुदतवाढ दिली जात आहे. त्यातच आता सातव्यांदा मुदतवाढ दिली गेली असून, २८ जुलैपर्यंत निविदा सादर करता येणार आहेत. त्यामुळे आता तरी निविदा येणार की नाही, अशी चर्चा म्हाडामध्ये सुरू आहे.

अभ्युदयनगर, काळाचौकी वसाहतीत २०८ चौरस फुटांची ३,४१० घरे आहेत. या वसाहतीच्या पुनर्विकासाची जबाबदारी राज्य सरकारने म्हाडावर टाकली आहे. त्यानुसार म्हाडाने सुरुवातीला ऑक्टोबर २०२४मध्ये विकसकाच्या नियुक्तीसाठी निविदा काढली होती. पुनर्विकास प्रकल्पातील पुनर्वसन घरांचे चटई क्षेत्रफळ किमान ६३५ चौरस फूट असावे, अशी अट म्हाडाने घातली होती. मात्र सहा वेळा मुदतवाढ देऊनही एकाही विकसकाने निविदा भरली नाही. त्यामुळे राज्य सरकारच्या मंजुरीने म्हाडाने पुनर्वसन सदनिकेचे क्षेत्रफळ ६३५ वरून ६२० पर्यंत कमी करीत विकसक नेमण्यासाठी नव्याने निविदा मागवल्या. त्यानुसार अंतिम निविदा भरण्याची मुदत १३ जुलै होती; मात्र अल्प प्रतिसाद मिळाल्याने म्हाडाने आता २८ जुलैपर्यंत मुदतवाढ दिली आहे. याबाबत म्हाडाच्या संबंधित अधिकाऱ्याकडे विचारणा केली असता, काही विकसकांनी प्रकल्पाच्या दृष्टीने आणखी वर्कआऊट करायचे असल्याने निविदा सादर करण्यास मुदतवाढ देण्याची मागणी केली होती. त्यानुसार मुदतवाढ दिल्याचे सांगितले. दरम्यान, प्रकल्पातील काही तांत्रिक बाबी समजून घेण्यासाठी निविदा पूर्व बैठकीला कल्पतरू, रुस्तमजी आणि महिंद्रा लाइफ स्पेस या तीन विकसक कंपन्यांनी हजेरी लावली होती.