जिल्हा परिषदेच्या पाच गटांच्या नावात बदल

वाडा, ता. १५ (बातमीदार) : आगामी स्थानिक स्वराज्य संस्थांच्या निवडणुकांच्या पार्श्वभूमीवर जिल्हा परिषद गट आणि पंचायत समिती गण रचनेचा प्रारूप आराखडा प्रसिद्ध करण्यात आला आहे. यामध्ये वाडा तालुक्यातील सहा जिल्हा परिषद गटांचा समावेश असून, जिल्हा परिषदेच्या गट रचनेमध्ये गटांची नावे बदलण्यात आली आहेत.

गारगाव (३१) गटाचे नाव बदलून वरसाळे करण्यात आले आहे, तर मोज (३२) गटाचे नाव बदलून गांध्रे, आणि मांडे (३३) गटाचे नाव बदलून गालतरे, केळठण (३४) गटाचे नाव बदलून खानिवली, आबिटघर (३५) गटाचे नाव बदलून खुपरी करण्यात आले आहे, मात्र कुडूस (३६) या गटाचे नाव पूर्ववत ठेवण्यात आले आहे. जिल्हा परिषद गटांचे बदलण्यात आलेल्या नावामुळे मतदारांमध्ये संभ्रम निर्माण झाला आहे. या अगोदर जिल्हा परिषद गटांना नाव देताना त्या गटातील सर्वाधिक लोकसंख्या असणाऱ्या ग्रामपंचायतीचे नाव देण्यात येत होते, मात्र या वेळी त्या गटातील सर्वात जास्त लोकसंख्या असणाऱ्या महसुली गावाचे नाव देण्यात आल्याची माहिती प्रशासनाकडून देण्यात आली आहे. त्यामुळे वाडा तालुक्यातील एकूण सहा गटांपैकी पाच जिल्हा परिषद गटांची नावे बदलण्यात आली आहेत.

निवडणूक आयोगाच्या मार्गदर्शक सूचनांनुसार जिल्हा परिषद गटांच्या नावात बदल करण्यात आला आहे. संबंधित गटांतील सर्वाधिक लोकसंख्या असणाऱ्या महसुली गावांची नावे या गटांना देण्यात आली आहेत.
- भाऊसाहेब अंधारे,
तहसीलदार तथा निवडणूक अधिकारी, वाडा तालुका