राहुल गांधी यांना दिलासा

राहुल गांधी यांना दिलासा
विरोधातील याचिका उच्च न्यायालयाने फेटाळली

सकाळ वृत्तसेवा
मुंबई, ता. १५ : स्वातंत्र्यवीर सावरकर यांच्याबाबत अपरिपक्व विधान करून लोकसभा विरोधी पक्षनेते राहुल गांधी यांनी आपल्या अधिकारांचे उल्लंघन केल्याचा आरोप करणारी जनहित याचिकेतील मागणी मंगळवारी (ता. १५) उच्च न्यायालयाने फेटाळून लावली.

अभिनव भारत काँग्रेसचे सह-संस्थापक पंकज फडणीस यांनी दाखल केलेली याचिका सर्वोच्च न्यायालयाने फेटाळून लावली आहे, असे निरीक्षण नोंदवून मुख्य न्या. आलोक आराधे आणि न्या. संदीप मारणे यांच्या खंडपीठाने फडणीस यांनी याचिकेत केलेली मागणी फेटाळून लावली. न्यायालय राहुल गांधी यांना जनहित याचिकेत उपस्थित मजकूर वाचण्याचे आणि सावरकरांबद्दलचे त्यांचे अज्ञान दूर करण्याचे आदेश देऊ शकत नाही, अशी टिप्पणीही न्यायालयाने केली.
दुसरीकडे सावरकर यांचे पणतू सात्यकी सावरकर यांनी राहुल यांच्याविरुद्ध आधीच पुण्यातील विशेष खासदार, आमदार न्यायालयात फौजदारी मानहानीचा खटला दाखल केला असून, तो प्रलंबित असल्याचेही नमूद करून याचिकेत केलेल्या विनंतीला परवानगी देण्यास नकार दिला. तसेच याचिकाकर्त्यांना योग्य व्यासपीठासमोर आपली तक्रार मांडण्याचे स्वातंत्र्य देऊन न्यायालयाने याचिका निकाली काढली.

राहुल गांधी विरोधी पक्षनेते आहेत. अशा पदावर असताना राहुल गांधी सावरकरांविरुद्ध अशा प्रकारची टिप्पणी करू शकत नाहीत, असा दावा फडणीस यांनी याचिकेत केला होता. तर सावरकर मुस्लिमांना देशद्रोही मानत होते, या राहुल गांधी यांच्या लंडनमधील भाषणावरही त्यांनी याचिकेतून आक्षेप नोंदवला होता. घटनात्मक पद सांभाळताना गांधी हे अधिकाराचा गैरवापर करू शकत नाहीत. त्यांच्या अशा वक्तव्यामुळे गोंधळ निर्माण होऊन देशातील तरुणांची दिशाभूल होत असल्याचा युक्तिवादही फडणीस यांनी केला.

सर्व काही तुम्हाला माहिती!
तरुण पिढी ही पंतप्रधानांपेक्षा विरोधी पक्षनेत्यावर जास्त विश्वास ठेवण्याची शक्यता आहे. आपल्या लोकशाहीत एक लोकप्रतिनिधी उद्या पंतप्रधान होऊ शकतो. त्यामुळे राहुल भविष्यात पंतप्रधान होऊ शकतात, असा युक्तिवादही फडणीस यांनी केला. परंतु ते पंतप्रधान होतील की नाही हे आम्हाला माहिती नाही, सर्व काही तुम्हालाच माहिती असल्याची टिप्पणीही न्यायालयाने केली.