२८ ग्रामपंचायतींचे आरक्षण जाहीर

अंबरनाथ, ता. १५ (वार्ताहर) : तालुक्यातील २८ ग्रामपंचायतींच्या सरपंचपदाचे आरक्षण सोडत सभा दुसऱ्यांदा पार पडली. कल्याण-बदलापूर मार्गावरील महात्मा गांधी शाळेच्या सभागृहात ही सभा झाली. या सभेत तालुक्यातील २८ ग्रामपंचायतींचे सरपंचपदाचे आरक्षण पुन्हा एकदा निश्चित करण्यात आले. उल्हासनगर उपविभागीय अधिकारी विजयानंद शर्मा यांच्या नेतृत्वाखाली आणि तहसीलदार अमित पुरी यांच्या अध्यक्षतेखाली ही सभा पार पडली.
राज्यातील ग्रामपंचायत निवडणुका काही महिने लांबणीवर गेल्यामुळे अनेक ग्रामपंचायतींमध्ये प्रशासनाच्या माध्यमातून कारभार सुरू ठेवण्यात आला होता. मात्र, आता सरपंच आरक्षण सोडत होत असल्याने लवकरच राज्यातील ग्रामपंचायत निवडणुका होण्याच्या मार्गावर आहेत. यंदा ही सोडत पुन्हा एकदा घेण्यात यावी, असे आदेश न्यायालयाने जाहीर केले. त्यानंतर अंबरनाथ तालुक्यात एकूण २८ ग्रामपंचायतींसाठी आरक्षण सोडत मंगळवारी (ता. १५) जाहीर करण्यात आली. दरम्यान १३ जून ते १५ जुलैपर्यंत सोडत सभा घेण्याचे राज्य सरकारने पुन्हा एकदा निर्देश दिले. या निर्देशानुसार २०२५ ते २०३० या पाच वर्षांच्या कालावधीसाठी ग्रामपंचायत सोडत सभा कोणत्याही आक्षेपाविना शांततेने व एकमताने पार पडली.

आरक्षणाची माहिती
तालुक्यातील बुर्दुल व साई या दोन जागा अनुसूचित जाती प्रवर्गसाठी आरक्षित केल्या. त्यापैकी बुर्दुल ही अनुसूचित महिला प्रवर्गासाठी आरक्षित. डोने, मांगरूळ, सांगावे यापैकी डोने अनुसूचित महिला प्रवर्ग जमातीसाठी आणि मांगरूळ व सांगावं अनुसूचित जमातीसाठी आरक्षित झाली. नागरिकांचा मागासवर्ग प्रवर्ग महिला प्रवर्गासाठी खरड, काकोळे, गोरेगाव, ढवळे गाव, कुडसावरे या ग्रामपंचायती आरक्षित झाल्या. मुळगाव, सावरे, हाजी मलंगवाडी, चामटोली या चार ग्रामपंचायती नामपसाठी आरक्षित झाल्याची माहिती तहसीलदारांनी दिली. उर्वरित १५ जागा सर्वसाधारण ग्रामपंचायतीसाठी आरक्षित केल्याचे जाहीर केले.