पालिकेच्या कारवाईविरोधात फेरीवाले मैदानात

पालिकेच्या कारवाईविरोधात फेरीवाले मैदानात
पालिका आयुक्तांसोबत आज बैठक
सकाळ वृत्तसेवा
मुंबई, ता. १५ : फेरीवाल्यांविरोधात पालिका आणि पोलिस प्रशासनाकडून होत असलेल्या कारवाईला विरोध करण्यासाठी मंगळवारी (ता.१५) संयुक्त फेरीवाला महासंघाच्या नेतृत्वाखाली आजाद मैदानावर भव्य मोर्चा काढण्यात आला. या आंदोलनात मुंबई, ठाणे, मीरा-भाईंदर, पालघर येथील फेरीवाले मोठ्या संख्येने सहभागी झाले होते. दरम्यान उद्योगमंत्री उदय सामंत यांनी मोर्च्याच्या ठिकाणी भेट घेत उद्या (ता. १६) पालिका आयुक्त व पोलिस आयुक्तांसोबत बैठक घेऊन फेरीवाला कायदा तसेच पालिकेकडून होणारी कारवाईबाबत तोडगा काढण्याचे आश्वासन दिले.

फेरीवाल्यांविरोधात सातत्याने पालिका व पोलिसांकडून होणाऱ्या कारवाईमुळे फेरीवाल्यांना व्यवसाय करणे कठीण झाले आहे. या विरोधात फेरीवाले आक्रमक झाले आहेत. फेरीवाला कायद्याची अंमलबजावणी होत नसून सरसकट कारवाई केली जाते. त्यामुळे संतप्त झालेल्या फेरीवाल्यांनी संयुक्त फेरीवाला समितीच्या नेतृत्वाखाली शिवाजी पार्कपासून आझाद मैदानापर्यंत भर पावसातही फेरीवाल्यांनी धडक दिली. या काळात फेरीवाल्यांनी आपले व्यवसाय पूर्णपणे बंद ठेवले होते. दरम्यान फेरीवाला कायदा, फेरीवाल्यांविरोधात होणारी सरसकट कारवाई याबाबत बुधवारी मंत्रालयात पालिका आयुक्त, पोलिस आयुक्त यांच्यासोबत होणाऱ्या बैठकीत तोडगा काढण्याचे आश्वासन मंत्री उदय सामंत यांनी दिले आहे. उपमुख्यमंत्री एकनाथ शिंदे यांच्यासोबत ही बैठक होणार आहे. या मोर्चानंतर फेरीवाल्यांच्या शिष्टमंडळाने मागण्यांचे निवेदन मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार यांची भेट घेऊन दिले. या शिष्टमंडळात आझाद हॉकर्स युनियनचे जयशंकर सिंह, भाजप हॉकर्स सेलचे अध्यक्ष बाबूभाई भवानजी, समृद्ध मराठी चेंबर ऑफ कॉमर्सचे संजय यादव राव, महाराष्ट्र हॉकर्स संघाचे सचिव शिवाजी सुले, दिव्यांग विकास संघाचे मंगेश मालवणकर आदी सहभागी होते.

...........