बैलगाडा शर्यतीविरोधातील याचिका फेटाळली

बैलगाडा शर्यतीविरोधातील याचिका फेटाळली

‘सर्वोच्च’च्या निर्णयाला बांधील असल्याचा उच्च न्यायालयाचा निर्वाळा

सकाळ वृत्तसेवा,
मुंबई, ता. १५ : राज्यातील बैलगाडा शर्यतीदरम्यान प्राण्यांना दिल्या जाणाऱ्या क्रूर वागणुकीविरोधात आणि बैलगाडा शर्यतीवर आक्षेप घेणारी जनहित याचिका मंगळवारी (ता. १५) उच्च न्यायालयाने फेटाळून लावली.

‘सर्वोच्च न्यायालयाच्या घटनापीठाने १८ मे २०२३ रोजी या मुद्द्यावर आधीच निर्णय दिला आहे. त्यामध्ये राज्यात बैलगाडा शर्यती, तमिळनाडूतील जल्लीकट्टू आणि कर्नाटकातील कांबळा यासारख्या शर्यतींना कायदे कायम ठेवण्यात आले आहेत. सर्वोच्च न्यायालयाने राज्यातील बैलगाडा शर्यतीशी संबंधित सर्व मुद्द्यांवर अंतिम निर्णय घेतला आहे. त्यामुळे अन्य कोणत्याही आदेशांची आवश्यकता नाही, आम्ही सर्वोच्च न्यायालयाला बांधील आहोत,’ असे स्पष्ट करून मुख्य न्या. आलोक आराधे आणि न्या. संदीप मारणे यांच्या खंडपीठाने स्पष्ट करत याचिका फेटाळून लावली. या वेळी मुक्या जनावरांच्या जीवावर बैलगाडा शर्यती खेळल्या जातात. पुढे अशा शर्यती जिंकणाऱ्यांना चारचाकी, पैसे आणि इतर व्यावसायिक बक्षिसे मिळतात, पण त्यासाठी जनावरांचे हाल केले जातात. बैलांना इलेक्ट्रिक यंत्र लावून त्यांना पळवले जाते. अनेकदा ते जखमी होतात, हे नियमांना धरून नाही, असे याचिकाकर्त्यांनी न्यायालयाला पटवून देण्याचा प्रयत्न केला, परंतु अशी भाषणे इथे करू नका, हे न्यायालय आहे. सार्वजनिक व्यासपीठ नाही, असे स्पष्ट करून न्यायालयाने याचिका फेटाळून लावली.

तुम्ही जनजागृती करा!
सुनावणीदरम्यान, याचिकाकर्त्यांनी युक्तिवाद करण्याचा आग्रह धरला. त्यावर तुम्ही प्राणिप्रेमी आहात, तुम्ही बैलगाडा शर्यतीचे आयोजन केले जाते, त्या गावात जाऊन प्राण्यांवरील क्रूरतेविरोधात जनजागृती करा, तिथे स्थानिक पातळीवर प्रयत्न करा, आम्हाला प्रत्येक वेळी, प्रत्येक गोष्टीवर देखेख ठेवता येणार नाही. तुम्ही ही याचिका प्रसिद्धीसाठी दाखल केली आहे का, अशी विचारणाही न्यायालयाने केली.