तीन तास मृतदेह शवागृहात पडून

रुग्णवाहिका चालकांचा भाडे आकारणीवरून वाद
कल्याण, ता. १६ (वार्ताहर) : इमारतीवरून पडून एका मजुराचा मृत्यू झाल्याने मृतदेह कल्याणहून तेलंगणाला घेऊन जायचे होते. त्यासाठी एका खासगी रुग्णवाहिका चालकाने २५ हजार रुपयांची मागणी केली, तर दुसरा खासगी रुग्णवाहिका चालक १५ हजार रुपयांत घेऊन जाण्यास तयार होता. मात्र पहिल्या रुग्णवाहिका चाककाने दुसऱ्या रुग्णवाहिका चालकाला मज्जाव केला. यावरून दोघा रुग्णवाहिका चालकांमध्ये वाद झाला. या वादामुळे मृतदेह जवळपास तीन तास शवागृहातच ठेवण्याची वेळ उद्भवली. नंतर मजुराचा मृतदेह तेलंगणाला नेण्यात आला; मात्र कल्याणच्या रुक्मिणीबाई रुग्णालयात खासगी रुग्णवाहिका चालकांची भाडे आकारणीवरून दादागिरी कुठल्या थराला गेली आहे, याचा प्रत्यय या घटनेमुळे आला आहे.

कल्याणमध्ये करिया बिच्चप्पा या मजुराचा इमारतीवरून पडून मृत्यू झाला. कल्याणच्या रुक्मिणीबाई रुग्णालयात त्याच्या मृतदेहाचे शवविच्छेदन करण्यात आले. मंगळवारी (ता. १५) त्याचा मृतदेह त्याचे नातेवाईक तेलंगणा येथील गावी नेण्याच्या तयारी होते. करिया याला तीन मुली आहेत. त्याच्या घरची परिस्थिती बिकट आहे. करियाची मित्रमंडळी आणि नातेवाइकांनी पैसे गोळा करून त्याचा मृतदेह तेलंगणाला घेऊन जाण्याची तयारी केली. त्यासाठी एका खासगी रुग्णवाहिका चालकाशी बोलणी केली. रोशन शेख नावाच्या रुग्णवाहिका चालकाने २५ हजार रुपये भाडे होईल, असे सांगितले. इतके पैसे जास्त होतात, थोडे कमी करा. आमच्याकडे पैसे नाहीत, असे सांगितले, तरीही हा रुग्णवाहिका चालक पैसे कमी करण्यास तयार नव्हता. त्याच ठिकाणी समीर मेमन हा रुग्णवाहिका चालक करियाचा मृतदेह तेलंगणाला घेऊन जाण्यास तयार झाला. त्याने त्यासाठी १५ हजार रुपये भाडे सांगितले. त्याला करियाच्या नातेवाइकांनी तयारी दर्शविली. त्याच वेळी रोशन शेख याने त्याला मज्जाव केला. तीन तास भाडे आकारणीवरून दोन्ही रुग्णवाहिका चालकांमध्ये वाद सुरू होता.

रुग्णवाहिका चालक समीर मेमनचे म्हणणे होते, की मी करियाच्या घरच्यांची परिस्थिती पाहून १५ हजारच्या भाड्यास तयार झालो. परंतु दुसरा रुग्णवाहिका चालक युनियनच्या नावे दादागिरी करीत होतो. हॉस्पिटलमध्ये कोणत्याही प्रकारची युनियन नाही, तरीही अशा प्रकारे दादागिरी सुरू असते. यासंदर्भात रुग्णवाहिका चालक रोशन शेख यांनी सांगितले, की २५ हजार भाडे सांगितले होते. ७०० किलोमीटर आहे. आम्हाला कमी भाडे परवडत नव्हते. आम्ही कोणत्याही रुग्वाहिका चालकाची अडवणूक केलेली नाही.