शिष्यवृत्ती परीक्षेत विद्यार्थ्यांचे यश

घाटकोपर (बातमीदार)ः महाराष्ट्र राज्य परीक्षा परिषद, पुणेतर्फे फेब्रुवारी २०२४ मध्ये घेण्यात आलेल्या शिष्यवृत्ती परीक्षेत भांडुपमधील श्री सरस्वती विद्यामंदिरातील २० विद्यार्थी गुणवत्ता यादीत झळकले. इयत्ता पाचवीतील १६ आणि इयत्ता आठवीतील चार विद्यार्थ्यांनी शिष्यवृत्ती प्राप्त केली आहे. इयत्ता पाचवीच्या विद्यार्थ्यांना अनिता साळवे, नीता केदारे, युवराज पाटील आणि प्रभाकर बरू या शिक्षकांनी मार्गदर्शन केले. तर इयत्ता आठवीच्या विद्यार्थ्यांना नरेंद्र भारंबे, प्रभाकर धुरी, चंद्रशेखर दळवी आणि प्रणाली सावंत या शिक्षकांनी मार्गदर्शन केले. संस्थेचे संचालक वसंत सावंत, संचालिका वर्षा सावंत, माध्यमिक विभागाच्या मुख्याध्यापिका प्रवीणा देऊलकर, उपमुख्याध्यापिका सुनीता गोळे, पर्यवेक्षक नरेंद्र भारंबे यांनी सर्व यशस्वी विद्यार्थ्यांचे अभिनंदन केले.