बर्डेपाडा येथे खड्ड्याचे दुखणे

किन्हवली, ता. १६ (बातमीदार) : किन्हवली-सो-कोचरे या मुख्य वर्दळीच्या रस्त्यावर बर्डेपाडा येथे पडलेल्या मोठ्या खड्ड्यामुळे अपघाताची भीती निर्माण झाली आहे. पावसाच्या पाण्यात भरलेल्या या खड्ड्याचा अंदाज न आल्यामुळे दररोज अनेक छोटे-मोठे अपघात होत आहेत. दुरुस्ती करूनही विशेष म्हणजे दरवर्षी पावसाळ्यात याच ठिकाणी हा खड्डा पडत असतो.
शहापूर तालुक्यातील जिल्हा मार्ग क्रमांक ६२ हा वासिंद-शेरे-शेंदृण-किन्हवली-सो-कोचरे हा १२.५ किलोमीटर अंतराचा रस्ता दोनच वर्षांपूर्वी डांबरीकरण केला होता. सोगावच्या पुढे मुरबाड तालुक्यातील टोकावडे व शिरोशी या गावांना जोडणाऱ्या रस्त्यावरून सध्या मोठ्या प्रमाणात वाहने धावत आहेत. कल्याण-अहिल्यानगर महामार्गाचे काम सुरू असल्याने माळशेजमार्गे पुणे, अहिल्यानगर, जुन्नर आदी ठिकाणी जाण्यासाठी किन्हवलीमार्गे सोगाव ते टोकावडे व्हाया या पर्यायी रस्त्याचा वापर मोठ्या प्रमाणात होतो. या रस्त्यावर बर्डेपाड्यानजीक एकाच ठिकाणी चार-पाच मोठे खड्डे पडल्याने दुचाकीस्वारांचे अनेकदा अपघात होत असतात. रस्त्यावरून वाहणाऱ्या पाण्यात भरलेल्या खड्ड्याच्या खोलीचा अंदाज येत नसल्याने वाहने जोरात आदळून त्यांचे नुकसान होत आहे. या परिसरातून दररोज शेकडो चाकरमानी, शाळकरी विद्यार्थी, दुग्धउत्पादक, भाजीपाला विक्रेते, शेतकऱ्यांच्या मालाची ने-आण करणारी वाहने आणि अवजड वाहने अहोरात्र धावत असतात. दुरुस्ती करूनही विशेष म्हणजे दरवर्षी पावसाळ्यात याच ठिकाणी हा खड्डा पडत असल्याने त्यावर विशेष प्रक्रिया करून खड्ड्याचा बंदोबस्त करावा आणि अन्य ठिकाणीही पडलेले खड्डे भरून प्रवाशांना दिलासा द्यावा, अशी मागणी होत आहे.

बर्डेपाडा रस्त्यावर पडलेले खड्डे भरण्याच्या सूचना ठेकेदाराला दिल्या आहेत. लवकर ते भरून रस्ता सुरळीत होईल.
- बी. आर. कांबळे, उपअभियंता, सार्वजनिक बांधकाम उपविभाग, शहापूर