१७ अतिधोकादायक इमारतींचे पुनर्वसन

जोगेश्‍वरी, ता. १७ (वार्ताहर)ः अंधेरी पूर्वेतील पीएमजीपीच्या १७ अतिधोकादायक इमारतींच्या पुनर्वसनाचे काम सुरू होणार आहे. येथील रहिवाशांना म्हाडाच्या माध्यमातून ४४८ चौरस फुटाचे घर देण्यात येणार असल्याचे आश्वासन देण्यात आले आहे.
अंधेरीतील पीएमजीपीच्या १७ अतिधोकादायक इमारतींमध्ये ९८२ सदनिकाधारक राहतात. या इमारतीच्या पुनर्विकासाचे काम २०१२ पासून रखडले आहे. म्हाडाच्या माध्यमातून या इमारतींचा पुनर्विकास केला जावा, असा आग्रह खासदार वायकर यांनी धरला होता. तसेच या इमारती अतिधोकादायक म्हणून घोषित केल्या असल्याने तातडीने पुनर्वसनाचे काम सुरू करावे, यासाठी खासदार रवींद्र वायकर यांनी उपमुख्यमंत्री एकनाथ शिंदे यांच्यासोबत सोमवारी (ता. १४) एक बैठक घेतली. या बैठकीत रहिवाशांना ५०० चौरस फुटांचे घर देण्यात यावे, अशी आग्रही भूमिका घेण्यात आली. अखेर ४४८ चौरस फुटांचे घर देण्यावर एकमत झाले आहे.
------------------------------
बैठकीतील महत्त्वाचे मुद्दे
- इमारतींच्या तोडण्याचे काम सुरू झालेल्या दिवसापासून रहिवाशांना म्हाडा भाडे देणार आहे. प्रती सदनिकाधारकांना दर महिन्याला रुपये २०,००० भाडे मिळणार आहे.
- रहिवाशांना दोन वर्षांचे भाडे एकदम त्यांच्या खात्यावर जमा करणार, वारसा हक्कासाठी विशेष कॅम्प लावणार, गरज भासल्यास तिसऱ्या वर्षाचे भाडेही म्हाडा देण्यास तयार. पुनर्विकासानंतर इमारतीची पाच वर्षांपर्यंत देखभाल म्हाडा करणार आहे.