शालेय प्रतिनिधींची मतदानातून निवड

घाटकोपर, ता. १६ (बातमीदार)ः देशातील समृद्ध लोकशाहीतील तत्त्वानुसार मतदानातून लोकप्रतिनिधी निवडण्याचा अधिकार प्रत्येकाला आहे. या गोष्टींची जाणीव विद्यार्थ्यांना व्हावी, यासाठी विवेक विद्यालय, विक्रोळी पार्कसाइट शाळेमध्ये सालाबादप्रमाणे यंदाही शाळा, सांस्कृतिक विभाग तसेच क्रीडा विभागातील प्रतिनिधींची निवड मतदानातून करण्यात आली.
देशातील लोकशाहीचे बाळकडू शालेय जीवनात मिळावे, यासाठी विक्रोळीचे विवेक विद्यालय विविध उपक्रम राबवते. याच अंतर्गत शाळेतील प्रतिनिधींची मतदानातून निवड करण्यात आली. निवडणुकीमध्ये १० वीतील विद्यार्थी उमेदवार होते. सर्व उमेदवारांना विविध प्रकारचे निवडणूक चिन्ह देण्यात आले होते. उमेदवारांनी मुद्दे व चिन्ह यांचा प्रचार सर्व वर्गांमध्ये जाऊन केला. निवडणूक प्रक्रिया आज पार पडली. शाळेतील सर्व विद्यार्थ्यांनी दिलेल्या मतपत्रिकेवर शिक्का उमटवून मतदान केले.
़़़़़़़़़़़ः----------------------------------
विजयी उमदेवारांचे अभिनंदन
मतमोजणी प्रक्रिया पूर्ण झाल्यानंतर सर्वाधिक मते मिळविणारे कृतिक बावदाने यास विद्यार्थी प्रतिनिधी, प्रांजल जाधव हिस विद्यार्थीनी प्रतिनिधी, संस्कृती पाटील यास सांस्कृतिक विभाग प्रतिनिधी व समृद्धी गोपाळे यास क्रीडा विभाग प्रतिनिधी म्हणून घोषित करण्यात आले. शाळेचे मुख्याध्यापक विवेक थोरात यांनी सर्व विजयी उमेदवारांचे अभिनंदन केले.