१५ जणांचा पोलिसांकडुन शोध सुरु

मनसेच्या उपशहर अध्यक्षाची पोलिस शिपायाला मारहाण
रबाळे पोलिस ठाण्यात तक्रार दाखल; शोध सुरू
नवी मुंबई, ता. १६ (वार्ताहर) : ऐरोली सेक्टर-३ परिसरात किरकोळ वादातून पोलिस शिपायावर नवी मुंबई मनसेचे उपशहर अध्यक्ष नीलेश बाणखेले व त्याच्या १० ते १५ साथीदारांनी एकत्रितपणे हल्ला केल्याची धक्कादायक घटना घडली आहे. रबाळे पोलिसांनी याप्रकरणी नीलेश बाणखेलेसह त्याच्या साथीदारांविरोधात गुन्हा दाखल करून त्यांचा शोध सुरू केला आहे.
सागर भोसले (वय ३५) हे नवी मुंबई पोलिस मुख्यालयात पोलिस शिपाई या पदावर कार्यरत आहेत. रविवारी (ता. १३) रात्री ११ वाजण्याच्या सुमारास सागर भोसले हे गांधी गार्डनजवळून घरी परतत होते. या वेळी समोरून आलेल्या एका चारचाकी वाहनचालकाने रस्त्यावरील अपुऱ्या जागेमुळे भोसले यांना शिवीगाळ करत गाडी मागे घेण्यास सांगितले. त्यामुळे भोसले यांनी सभ्य भाषेत बोलण्यास सांगितले. या कारणावरून संबंधित चालकाने गाडी थांबवत शिवीगाळ सुरू केली. या वेळी जवळच उभ्या असलेल्या मनसेचा नवी मुंबई उपशहर अध्यक्ष नीलेश बाणखेले आपल्या १० ते १५ सहकाऱ्यांसह त्या ठिकाणी आला.
त्यानंतर नीलेश बाणखेले व त्याच्या सहकाऱ्यांनी भोसले यांना जबरदस्तीने गाडीतून खाली ओढून सर्वांनी बेदम मारहाण केली. यामध्ये भोसले यांना गंभीर दुखापत झाली आहे. याप्रकरणी रात्री उशिराने रबाळे पोलिस ठाण्यात तक्रार दाखल झाली आहे. त्यानुसार नीलेश बाणखेले व त्याच्या साथीदारांविरोधात गुन्हा दाखल करण्यात आल्याची माहिती वरिष्ठ पोलिस निरीक्षक बाळकृष्ण सावंत यांनी दिली. याप्रकरणी सीसीटीव्हीच्या माध्यमातून आरोपींची ओळख पटविण्यात येत असल्याचेही सावंत यांनी सांगितले.