सुब्रोतो मुखर्जी फुटबॉल कप स्पर्धेचा शुभारंभ सोहळा संपन्न..

सुब्रोतो मुखर्जी फुटबॉल कप स्पर्धा सुरू
विरार, ता. १६ (बातमीदार) ः क्रीडा व युवक संचालनालय राज्य, जिल्हा क्रीडा परिषद कार्यालय पालघर व वसई विरार शहर महापालिका क्रीडा विभाग यांच्या संयुक्त विद्यमाने आयोजित जिल्हास्तरीय शालेय व महाविद्यालयीन सुब्रोतो मुखर्जी फुटबॉल स्पर्धेला मंगळवारी (ता. १६) म्हाडा मैदान येथे सुरुवात झाली. या स्पर्धेच्या उद्‍घाटनप्रसंगी खासदार डॉ. हेमंत सवरा, आमदार स्नेहा दुबे-पंडित, माजी महापौर राजीव पाटील, माजी उप-महापौर सगीर डांगे, अतिरिक्त आयुक्त संजय हेरवाडे, उप-आयुक्त (क्रीडा) दीपक झिंजाड, सहाय्यक आयुक्त व्हिक्टर डिसोजा, भाजपा जिल्हाध्यक्ष प्रज्ञा पाटील, पालघर जिल्हा क्रीडा अधिकारी सुहास व्हनमाने, जिल्हा क्रीडा सल्लागार गोविंद शिंदे, क्रीडा स्पर्धा प्रमुख योगेश चौधरी, प्राचार्या मुग्धा लेले, शालेय व महाविद्यालयीन क्रीडा शिक्षक, प्रशिक्षक, खेळाडू, विविध पदाधिकारी, नागरिक, महापालिकेचे कर्मचारी आदी उपस्थित होते.
वसई विरार शहर महापालिकेच्या स्थापनेपासून महापालिका क्रीडा विभागामार्फत दरवर्षी सुब्रोतो मुखर्जी फुटबॉल स्पर्धेचे आयोजन केले जाते. यामध्ये महापलिका क्षेत्रातील एकूण ७३ फुटबॉल संघांनी भाग घेतला असून, ८०० हून अधिक खेळाडूंचा यात समावेश आहे. ही स्पर्धा १५ ते १९ या कालावधीत होणार आहे. स्नेहा दुबे-पंडित यांनी उद्‍घाटनाच्या सामन्यावेळी नाणेफेक करून व हेमंत सवरा यांनी फुटबॉलला किक मारून स्पर्धेची सुरुवात केली.
या फुटबॉल स्पर्धेत मोठ्या संख्येने म्हणजेच एकूण ७३ फुटबॉल संघांनी भाग घेतल्याबद्दल आश्चर्य वाटत असून, वसई विरार शहर महापालिका विविध खेळांना व खेळाडूंना ज्याप्रमाणे प्रोत्साहन देत आहे ते खूपच वाखाणण्यासारखे आहे. अशा प्रकारच्या खेळांमध्ये खेळाडूंना दुखापत होण्याची शक्यता लक्षात घेता महापालिकेने दहीहंडी विमा योजनेप्रमाणेच या क्रीडा स्पर्धांच्या कालावधीसाठी खेळाडूंना विमा, मेडिक्लेम आदी सुविधा देण्याचे प्रयोजन करण्याचे हेमंत सवरा यांनी म्हटले.