सानपाड्यात सामाजिक कार्यकर्त्याचे उपोषण मागे

सानपाड्यात सामाजिक कार्यकर्त्याचे उपोषण मागे
जुईनगर, ता. १६ (बातमीदार) : सानपाडा सेक्टर-४ येथील गेली चार वर्षे बंद असलेले दैनंदिन बाजार संकुल नागरिकांच्या सेवेसाठी तत्काळ सुरू करावे आणि सेक्टर-५ येथील खासदार निधीतून उभारण्यात आलेली व्यायामशाळा तरुणांसाठी खुली करावी आदी प्रमुख मागण्यांसाठी सामाजिक कार्यकर्ते नीलेश कचरे यांच्या नेतृत्वाखाली त्यांच्या सहकाऱ्यांसह मंगळवार (ता. १५) अन्नत्याग उपोषण करण्यात आले होते.
प्रशासनाकडे वारंवार मागणी करूनही कोणतीही ठोस कारवाई होत नसल्याने उपोषण करावे लागले असल्याचे कचरे यांनी सांगितले, मात्र या उपोषणादरम्यान नवी मुंबई महानगरपालिकेचे तुर्भे विभागाचे सहाय्यक आयुक्त तथा विभागीय अधिकारी सागर मोरे यांनी शिष्टमंडळासह उपोषणस्थळी भेट देऊन मागण्या लेखी स्वरूपात पूर्ण करण्याचे आश्वासन दिले. यानंतर सागर मोरे यांच्या हस्ते फळांचा रस प्राशन करून उपोषण घेण्यात आले.
उपोषणात समाजसेवक श्रीराम मढवी, सचिन शेलार, सागर गाडगे, संदीप पाटील, ॲड. सुनंदा निकम, जयश्री आहेर, प्रेम बनसोडे व कचरे कुटुंबीय यांनी सक्रिय सहभाग नोंदवला होता.

लेखी आश्वासन
त्यात सेक्टर-५ येथील व्यायामशाळा नोव्हेंबर २०२५ पर्यंत सर्व कायदेशीर प्रक्रिया पूर्ण करून साहित्यासह सुरू केले जाईल. सेक्टर-४ मधील दैनंदिन बाजार संकुलातील स्टॉल बांधकाम पूर्ण होताच नागरिकांसाठी खुले करण्यात येईल. या इमारतींमध्ये रात्रपाळीत सुरक्षा रक्षक नेमण्यात येणार आहेत. दैनंदिन बाजारातील ओट्यांचे वाटप हे सर्व्हे नंबरनुसार पारदर्शक पद्धतीने करण्यात येणार असून, कोणावरही अन्याय होणार नाही, याची दक्षता घेण्यात येईल.