सिडको मुख्यालयावर उद्या गांधीगिरी आंदोलन

खारघर, ता. १६ (बातमीदार) : स्वप्नपूर्ती सोसायटीतील पाणीसमस्या सोडविण्याचे आश्वासन देऊनही सिडको प्रशासनाकडून दुर्लक्ष होत आहे. त्‍यामुळे संतप्त रहिवाशांनी गुरुवारी (ता. १७) सिडकोच्या व्यवस्थापकीय संचालकांना हंडा, कळशी भेट देऊन गांधीगिरी मार्गाने आंदोलन करण्याचा निर्णय घेतला आहे.
खारघर सेक्टर ३६ मधील सिडकोच्या स्वप्नपूर्ती गृहनिर्माण सोसायटीत जवळपास ५६ इमारत असून तीन हजार ८०० हून अधिक सदनिका आहे. दरम्यान, गृहसंकुलातील इमारत क्रमांक चार, पाच, आठ तसेच इतर काही सोसायटीला पुरेसा पाणीपुरवठा होत नसल्यामुळे रहिवाशांना टॅंकरच्या पाण्यावर अवलंबून राहावे लागते. सोसायटीमधील पाणी व इतर समस्यांसंदर्भात एप्रिलमध्ये सिडकोच्या पाणीपुरवठा विभागाच्या अधिकाऱ्यांसोबत झालेल्या बैठकीत सोसायटीतील टाकी क्रमांक आठसाठी स्वतंत्र जलवाहिनी टाकण्याचे मान्य करण्यात आले होते. वेळोवेळी पत्रव्यवहार करूनही पाणीसमस्‍येवर तोडगा काढण्यात येत नसल्‍याने गुरुवारी सिडको मुख्यालयावर गांधीगिरीच्या मार्गाने आंदोलन करण्यात येणार आहे. तसेच, या वेळी सिडकोच्या व्यवस्थापकीय संचालकांना हंडा-कळशी भेट देण्यात येणार आहे. या आंदोलनाचे पत्र सिडको प्रशासनाला देण्यात आले आहे.